Bıylǵy 1 aqpannan bastap buryn bekitilgen tarıfterdiń qoldanylý merziminiń aıaqtalýyna baılanysty, Tabıǵı manopolıany retteý komıtetiniń Almaty qalasy boıynsha departamenti 2025-2029 jyldarǵa arnalǵan bes jyldyq kezeńine sýmen jabdyqtaý jáne sý burý qyzmetterine tarıfterdi bekitti. Atalǵan departament basshysy Ásel Bódeneeva qala turǵyndary úshin osy ózekti máseleniń mán-jaıyn BAQ ókilderine málim etti.
Departament basshysynyń aıtýynsha, qala turǵyndary úshin sýmen jabdyqtaýdyń ortasha tarıfi tekshe metrine – 135,24 teńge (QQS-syz), sý burýda – 83,54 teńge (QQS-syz) quraıtynyn atap aıtty. Álbette, bul tarıf burynǵy bekitilgeninen tıisinshe 9,6 paıyz jáne 27,5 paıyzǵa artyq. Buǵan qosa, 3-ke, 3-ten 5-ke, 5-ten 10-ǵa deıin jáne 10 tekshe metrden astam sýdy tutyný kólemine baılanysty da saralanǵan tarıfter bekitildi.
«Mundaı ózgeriske ne áser etti?» degen saýalǵa jaýap bere ketelik. Birinshiden, sý esepteý aspabynsyz tutynýshylar úshin tólemaqy kólemin belgileýge Almaty qalasy ákiminiń 2024 jylǵy qaýlysymen bekitilgen sý tutyný normasynyń ózgerýi áser etti. Munda ortasha tutyný normasy 8,4-ten 15 tekshe metrge deıin ulǵaıtylǵan-dy. Aıta keterligi, jergilikti atqarýshy organnyń sý tutynýdyń sońǵy normasy 1989 jyly bekitilgen bolatyn. Shyny kerek, 1 tekshe metrde 1 000 lıtr sý bar. Olaı bolsa, osynsha kólemdi aýyz sýǵa 151 teńge tóleý degen ne turady? Dúkendegi bótelkedegi 1 lıtr sýyń 232 teńge emes pe», – deıdi Tabıǵı manopolıany retteý komıteti Almaty qalasy boıynsha departamentiniń basshysy Á. Bódeneeva.
Turmystyq qajettilikke saı, resýrstyq aýyz sýdy qosymsha paıdalanatyn tutyný mádenıeti joq jeke tutynýshylar bar. Osylaısha, tutynýshylardyń kóppáterli turǵyn úıde turatyny, sondaı-aq esepke alý aspaby baryn eskerilmek. Atalǵan sanattaǵy tutynýshylar tarıftiń ózgerýin asa sezbeıtin sıaqty. Bul jaǵdaı jeke sektorda turatyn tutynýshylarǵa kóbirek áser etetini anyq. Óıtkeni, olar sýdy vanaǵa, avtokóligin jýýǵa, aýlasyna sebýge, baý-baqshasyn sýarýǵa qosymsha kóbirek paıdalanady.
Aqshany únemdeý maqsatynda tutynýshylar esepke alý aspabyn ornatyp, páter men úılerde naqty turatyndardyń sanyn naqtylaý pysyqtalýy qajet. Taǵy bir núans – bul naqty derekti berý. Tutynýshy esepke alý aspabynyń kórsetkishin berýge mindetti. Sonymen birge, kórsetkishti alýda esepke alý aspabyna qol jetkizýge mindetti. Bul rette, tólem qujatynda esepteýdi úzdiksiz aı saıyn berý úshin esepke alý aspabynyń naqty kórsetkishi bolmaǵan rette esepteý ortasha táýliktik shyǵyspen júrgiziledi.
Úsh aıda bir ret ónim berýshi tutynýshynyń esepke alý aspabynan kórsetkishti alýynyń durystyǵyn teksergen kezde esepteý somasyn túzetý oryndalady. Turǵyndarǵa yńǵaıly bolý úshin sýyq sý eseptegishiniń kórsetkishin ózdiginen jiberýdiń birneshe ádisi bar. Sonymen qatar, qyzmetti jetkizýshilerdiń quqyǵy buzylǵan ne durys eseptelmegeni jóninde dálel bolǵan jaǵdaıda tutynýshy departamentke júginýge quqyly. Departament óz kezeginde den qoıý sharasyn qoldanady.