Qorǵanys vedomstvosynyń basshysy general-polkovnık Rýslan Jaqsylyqov Birikken Arab Ámirlikterindegi arnaıy maqsattaǵy bólimsheler jarystaryna alǵash ret qatysqan Arnaıy operasıalar kúshteriniń áskerı qyzmetshilerin quttyqtady.
Ol mundaı jarys áskerılerdiń jaýyngerlik qabiletin arttyrýǵa, tájirıbe almasýǵa jáne elder arasyndaǵy qaýipsizdik salasyndaǵy ózara is-qımyldy nyǵaıtýǵa yqpal etetinin atap ótti.
– Arnaıy operasıalar kúshteriniń "Jaýbasar" komandasy alǵash ret elıtalyq bólimshelerdiń jarystaryna qatysty. Jarys baǵdarlamasy arnaıy polısıa kúshterine arnalǵan. Degenmen, jaqsy nátıje kórsettińder. Alda Iordanıadaǵy áskerı arnaıy maqsattaǵy bólimshelerdiń jáne Ulybrıtanıadaǵy "Kembrıı patrýli" jarystary ótedi. Olardyń nátıjelerinen senderdiń kásibı daıarlyqtaryńdy kóre alamyz, – dedi general-polkovnık R. Jaqsylyqov.
Halyqaralyq jarystardyń qorytyndysy boıynsha erekshe kózge túsken áskerı qyzmetshiler merziminen buryn áskerı ataǵyn aldy. Sonymen qatar, birqatar ofıserlerge Qorǵanys mınıstri "El qorǵany" medalin, Arnaıy operasıalar kúshteriniń belgisin jáne alǵys hattardy tabys etti.
Esterińizge sala ketsek, Dýbaıda ótken UAE SWAT Challenge-2025 jarysy álemniń 80-nen astam elinen 106 komandanyń basyn qosty. Saıysqa elimizdiń kúsh qurylymdarynyń 12 komandasy qatysty.