Bul týraly Ǵylym jáne joǵary bilim mınıstri Saıasat Nurbek aıtty.
Mınıstrdiń aıtýynsha, stýdentiń akademıalyq bilimimen birge áleýmettik jáne zertteý belsendiligin eskeretin pılottyq joba qolǵa alynady, dep habarlaıdy Almaty-akshamy.kz
«Eńbek naryǵyn joǵary bilim deńgeıinde tájirıbeli mamandarmen qamtamasyz etý jáne olardy mobıldi daıarlaý úshin qoldanbaly bakalavrıat modeli engizildi. Osy jyldyń qyrkúıek aıynan bastap pılottyq rejımde 8 joǵary oqý ornynyń bazasynda jańa baǵdarlamalar iske qosylady. Sondaı-aq, 4 joǵary oqý ornynyń bazasynda pılottyq rejımde stýdentterdiń áleýmettik jáne zertteý belsendiligin eskeretin bilim alýshylardy baǵalaýdyń jańa modeli, ıaǵnı ıntegraldyq GPA pılottyq jobasyn bastap jatyrmyz. Endi stýdentterdi baǵalaý kezinde tek akademıalyq kórsetkishter emes, zertteýlerge, volonterlik, debattyq qozǵalystarǵa qatysýy da eskeriledi», - dedi mınıstr.
Onyń aıtýynsha, tamyzdyń sońynda joǵary bilim berý salasynyń ókilderi derbes Tamyz konferensıasyn ótkizbek.
«Tórtinshiden, joǵary oqý oryndary akademıalyq proseske daıyndyqty qamtamasyz etý jónindegi jumysty aıaqtady. Rektorlarmen úsh úlken kezdesý ótkizdik. Bilim berý baǵdarlamalaryn oqý-ádistemelik qamtamasyz etý, kesteni bekitý, pedagogıkalyq júktemeni anyqtaý, oqytýshy-professorlyq quramnyń biliktiligin arttyrýdy qamtamasyz etý jumystary atqaryldy.
24-25 tamyzda Tamyz konferensıasyn ótkizemiz. Forým aıasynda forsaıt-sessıalar men birqatar semınarlar uıymdastyrylady», - dedi vedomstvo basshysy.