Gúlder netken ásem, netken názik! Qyzyldy-jasyldy gúlder arý Almatynyń sulýlyǵyn ústep turǵany anyq. Iá, bizdiń qala jazda ádemi gúlderge oranyp turady. Ásirese, qazaqy oıýlar beınesinde otyrǵyzylǵan gúlder kózdiń jaýyn urlaıdy.
Almatynyń birde-bir saıabaǵy gúlsiz emes, iri ǵımarattardyń da, shaǵyn mekemelerdiń aldy da gúlderge toly. Túrli ósimdikteri jaıqalǵan trotýarlarmen qydyryp, serýendegen de bir ǵanıbet! Janǵa rahat syılaıdy. Kóńilińiz kóterilip sala beredi. Kóńilińiz kóterilip sala beredi. Ádemilik balaǵa da, úlkenge de kóptik etpeıdi.
Aıtpaqshy, jasyl jelektiń aýasynda adam densaýlyǵyna qajetti jeńil ıondar bolady. Sonyń arqasynda syrtta serýendep júrgen adamnyń qan quramy jaqsaryp, qan qysymy da bir qalypqa keledi eken, sondaıaq jumysqa degen qabileti de artatyn kórinedi.
Sol gúlderden lázzat alatyn tek biz, adamdar, ǵana ekenbiz. Al kóbelek, ara syndy shybyn-shirkeılerge keregi – olardyń túsi, ısi. Óıtkeni, gúlder - bul jándikterdiń azyǵy: bireýlerin shyrynymen, al keıbirin tozańymen qorektendiredi.
Ósimdikterdiń uryq salýy úshin bir gúldiń tozańyn ekinshi gúlge kóshirý qajet. Al sol tozańdy tasymaldaıtyn álgi shybyn-shirkeıler. Iaǵnı shyrynnyń tátti tamshysyn alystan bilip ushyp kelgen kóbelek gúlge qonady, sol sátte oǵan tozań da jabysa ketedi. Sosyn kóbelek kelesi bir gúlge qonǵanda, onyń aıaqtarymen ilese kelgen tozań da ekinshi gúlge jabysyp úlgiredi.
Tozańdy tek kóbelekter ǵana emes, basqa shybyn-shirkeıler de tasymaldaıdy. Tek árqaısysy ár gúldi unatady eken. Máselen, bal arasy men jaı ara da injýgúlge qonbaıtyn kórinedi. Al masa bitken injýgúldi jaqsy kóredi desedi. Keıbir gúlder kesh túse ǵana ashylyp, óziniń hosh ıisti shyrynyn túnde berip túgesedi. Ádette mundaı gúlderdiń túsi aq bolady. Olarǵa túngi kóbelekter áýes keledi.
Mine, gúlderdiń adamǵa da, jándikterge de paıdasy mol. Gúlder, ádette, megapolıstiń kisi aıaǵy kóp júretin jerlerinde, ortalyq, iri kóshelerdiń boıynda ósiriledi. Biraq kóp qabatty úılerimizdiń aýlasyna ósire bermeımiz. Sebebi, aınalany kóriktendirý tek ákimdiktiń jumysy dep oılaımyz kóbimiz. Al eger bárimiz aýlamyzǵa gúl egip, ony erekshe baptap ósirsek, ózimiz turatyn aýdannyń ajary da arta túspeı me? Máselen, Eýropa elderinde turǵyndar aýladaǵy ósip turǵan gúlderdi ózderi kútimge alǵan. Biz de - tabıǵattyń bir bólshegimiz. Aýla da, aýa da bárimizge ortaq bolǵandyqtan, ony kórkeıtýdi ár adam paryzy dep sanasa, artyq bolmas edi.