S. J. Asfendıarov atyndaǵy Qazaq Ulttyq medısına ýnıversıtetiniń stýdentteri Halyqaralyq stýdentter kúni men ýnıversıtettiń Stýdenttik úkimet uıymynyń on bes jyldyǵyna oraı, Donorlar kúnin ótkizdi. Bolashaq dárigerler shyn júrekterinen shyqqan bul qaıyrymdylyq sharasyn naýqas balalardyń ómirin qutqarýǵa arnady.
Bolashaq dárigerlerdiń donor bolýǵa degen yqylastaryn Almaty qalalyq Qoǵamdyq densaýlyq saqtaý basqarmasyna qarasty Qalalyq Qan ortalyǵynyń ujymy qýana quptady. Qan tapsyrýǵa ýnıversıtettiń seksen stýdenti ótinish bildirse, donor bolýdyń basty talaptaryna sáıkes, onyń elý ekisi ǵana qan tapsyrýǵa joldama aldy. Jas ta bolsa, osyndaı saýapty da qaıyrymdy iske at salysa bilgen jastarǵa Ortalyq dırektory, qalalyq máslıhat depýtaty Jandos Qýanyshbekuly Nádirov óz rızashylyǵyn bildirdi.
«Qan tapsyryp, ómirge úmit syıla!» qaıyrymdylyq aksıasyna qatysyp, ózderiniń donor bolýǵa degen ótinishterin bildirip jatqan stýdentterge shyn júrekten alǵys aıtamyz. Sizderdiń bul qaıyrymdylyq isterińiz aýrýhana tósegine tańylyp, bir tamshy qanǵa zárý bolyp jatqan naýqas balalardyń ómirin qutqarýǵa jumsalatynyn bilseńizider, júrekterińizdi qýanysh sezimi bıleri anyq. Adam úshin adamnyń ómirin qutqarýdan artyq saýapty is bolmas. Sizder donor bolýǵa yqylas tanytyp qana qoımaı, bizdiń qoǵamda jaqsy iske dáneker bolar, qaıyrymdylyq jasaýǵa jany jaqyn jastardyń baryn bildirip, qandaı iste birlese, birge bola alatynymyzdy kórsetip, bizdi qýantyp otyrsyzdar. Taǵy da sizderge alǵys bildiremiz jáne de bizdiń Ortalyqtyń donorlar sanyn arttyrýǵa úlesterińizidi qosqandaryńyz úshin rahmet aıtamyz, - dedi Ortalyq dırektory óz sózinde.
Qaıyrymdylyq sharasynyń nátıjesinde jıyrma alty lıtr qan jınalǵan, ol qan tapshylyǵyn sezinip jatqan naýqas balalar jatqan aýrýhanalarǵa jóneltiletin bolady.
Esterińizge sala ketsek, jasy on segizge tolǵan, densaýlyǵynda kináraty joq kez kelgen adam donor bola alady. Deıturǵanmen, qan tapsyrar aldynda qatań saqtalýǵa tıisti talaptar bar. Sol talaptardy oryndaı bilseńiz, DONOR degen qurmetti tulǵanyń qataryna qosyla alasyz.
Al bolashaq dárigerlerdiń bul qaıyrymdy isteri jastar arasynda óz jalǵasyn tabatynyna senimdimiz.