Ǵylym jáne joǵary bilim mınıstrligi stýdentterdi jataqhanamen qamtamasyz etý úshin qandaı jumystar istelip jatqanyn málim etti, dep habarlaıdy Almaty-akshamy.kz QazAqparatqa silteme jasap.
«Tapshylyq shamamen 70 myń oryn bolyp otyr. Onyń 50 paıyzy - Almaty, Shymkent jáne Astana qalalarynda. Almaty qalasyna sapar aıasynda mınıstrlik basshylyǵy jobalyq ofıske baryp, ınvestorlarmen jumysty jandandyrýdy tapsyrdy. Almaty qalasynyń tájirıbesi Astana men Shymkent qalalaryna taratylady. Ǵylym jáne joǵary bilim mınıstrligi SQO, Aqmola, Aqtóbe, BQO, Qaraǵandy, Túrkistan, Mańǵystaý, Pavlodar, Qyzylorda, SHQO, Jetisý oblystarynyń, Astana, Almaty jáne Shymkent qalalarynyń ákimdikterimen birge 2023 jyly jataqhanalardy paıdalanýǵa berý jóninde jol kartasyn qabyldady», - dep atap ótedi mınıstrlik agenttiktiń resmı saýalyna oraı.
Vedomstvo málimetinshe, bıyl 10 949 orynǵa arnalǵan 37 jataqhananyń tizimi aıqyndalǵan. Onyń ishinde jeke ınvestısıa esebinen 9 231 orynǵa arnalǵan 30 jataqhana, shaǵyn bıznes qarajaty esebinen 1 218 orynǵa arnalǵan 6 jataqhana jáne demeýshilerdiń qarajatyna 500 oryndyq bir jataqhana salynady. 37 jataqhananyń 8 837 orynǵa shaqtalǵan 26-sy JOO stýdentterine, al 2 112 stýdent syıatyn 11 jataqhana kolejderge beriledi.
Qazirgi ýaqytta 1 500 oryndyq 4 jataqhana daıyn. Sonymen qatar, 496 oryndyq 3 jataqhana daıyndyǵy 90 paıyzdan asady. 2 395 orynǵa arnalǵan 8 jataqhananynyń qurylys jumystary 80 paıyzdan astamǵa, 375 oryndyq 1 jataqhananyń qurylys jumystary 70 paıyzdan astamǵa oryndalǵan. Munan bólek, 1 026 oryndyq 3 jataqhana daıyndyǵy – 60, 750 oryndyq taǵy 3 jataqhananyń daıyndyǵy 50 paıyzdan asyp jyǵylady. 980 stýdent syıatyn 1 jataqhananyń qurylys jumystary 40 paıyzdan astamǵa oryndalǵan. Al, 1 316 orynǵa shaqtalǵan 3 jataqhana 20 paıyzdan astamǵa ǵana daıyn.