2023 jylǵy 2 toqsan qorytyndysy boıynsha óndiristegi jazataıym oqıǵalardan 640 jumysker zardap shegip, onyń 69-y qaza tapty. Mundaı derekti Eńbek jáne halyqty áleýmettik qorǵaý mınıstrligi usyndy, dep habarlaıdy Almaty -akshamy. kz.
Bul rette bıylǵy 6 aıdyń qorytyndysy boıynsha óndiristik jaraqattaný 2022 jyldyń ekinshi jartyjyldyǵymen salystyrǵanda 4%-ǵa tómendegeni baıqaldy.
2023 jyldyń 6 aıynda óndiristik jaraqattaný koefısıenti (1000 jumyskerge shaqqandaǵy jazataıym oqıǵalardyń jıiligi) 0,09 qurady.
Dese de Qazaqstannyń ónidiristik aımaqtarynda jaraqat alýdyń eń joǵary deńgeıi saqtalyp otyr. Máselen, Qaraǵandy oblysynda - 79 adam, SHQO-da – 53 adam, Abaı oblysynda – 50 adam, Pavlodar oblysynda – 46 adam, Qostanaı oblysynda – 44 adam, Aqtóbe oblysynda – 40 adam jumys barysynda zardap shekken. Sondaı-aq Almaty qalasynda 50 adam túrli dene jaraqattaryn aldy.
Ekonomıkanyń salalary boıynsha eń kóp zardap shekkender taý-ken metalýrgıa kesheniniń ónerkásipterinde – 21,8% jáne qurylys salasynda – 10,6%.
Jazataıym oqıǵalardyń oryn alýynyń negizgi sebepteri:
jábirlenýshiniń óziniń óreskel abaısyzdyǵy - 33,3%;
óndiristegi jumystyń tıisti deńgeıde uıymdastyrylmaýy - 27,1%;
eńbek qaýipsizdigi jáne eńbekti qorǵaý erejelerin buzý - 9,3%;
jol qozǵalysy erejelerin buzý - 8,4%.
Sońǵy bes jyldyń ishinde memlekettik organdar men jumys berýshilerdiń eńbekti qorǵaý salasy boıynsha qabyldanǵan keshendi sharalardyń nátıjesinde óndiristik jaraqattaný deńgeıi 6,5%-ǵa tómen tústi.
Profılaktıka men buzýshylyqty aldyn alý maqsatynda elimizdiń 3211 kásiporny qaýipsizdik pen eńbekti qorǵaý standarttaryn engizdi.
Sondaı-aq Qazaqstan Respýblıkasynyń Kásipodaqtar federasıasymen birlesip, múgedektigi bar adamdardy «halyqtyq baqylaýshy» retinde tartýdy kózdeıtin «Halyqtyq baqylaý» áleýmettik mańyzdy jobasy engizilip jatyr. Búgingi kúni jobany júzege asyrýǵa respýblıkanyń 252 kásiporny qosylyp, onda 600-den astam jumysker ishki baqylaýdy júzege asyryp jatyr.
2019 jyldan bastap mınıstrlik tarapynan «Nóldik jaraqat - Vision Zero» tujyrymdamasyn jetildirý bolıynsha belsendi jumys atqarylyp keledi. Oǵan 440 kásiporyn qosylǵanyn aıta ketý kerek.
Sonymen qatar Qazaqstanda «Onlaın eńbek konsýltanty» elektrondy servısi de iske qosyldy. Ol jumysker men jumys berýshiniń arasynda qashyqtyqtan ózara árekettesýdi qamtamasyz etý úshin eńbek zańnamasynyń saqtalýynyń tıimdiligin arttyrýǵa múmkindik beredi. Servıs jumys berýshiniń eńbekti qorǵaý talaptarynyń saqtalýyn ózindik tekserýden ótýin qarastyrady.