Almaty qalasynyń ákimi Erbolat Dosaevtyń tapsyrmasyna sáıkes, Almaty qalasynyń 2025 jylǵa deıingi damý baǵdarlamasynda stýdentterdiń tolyqqandy jaǵdaıyn qamtamasyz etý úshin qalalyq oqý oryndarynda bilim berý, turý jáne stýdentterge qyzmet kórsetý sapasyn arttyrýǵa baǵyttalǵan ádistemelik usynystar ázirleý mindeti qoıylǵan bolatyn.
Atalǵan baǵytta Almaty qalasy ákimdiginiń jastar saıasaty basqarmasynyń qoldaýymen «Oqý oryndarynda stýdentterdiń oqý, ómir súrý jáne olarǵa qyzmet kórsetý sapasyn jaqsartý boıynsha ádistemelik usynymdar ázirleý» jobasy júzege asýda, dep habarlaıdy almaty-akshamy.kz.
Osy rette, 9 qarashada Almaty qalasynda atalǵan joba aıasyndaǵy alǵashqy dóńgelek ústeldiń otyrysy ótti. Kezdesýde úkimettik emes uıymdar, sarapshylar qaýymdastyǵy, qoǵamdyq pikir kóshbasshylary, jergilikti depýttar men ýnıversıtet prorektorlary óz oılaryn ortaǵa salyp, sarapshylar zertteý nátıjeleriniń aralyq qorytyndysyn talqylady.
Almaty qalasynyń máslıhat depýtaty Ásıa Aqanovanyń aıtýynsha, bul bastama elimiz boıynsha alǵash ret Almaty qalasynda qolǵa alynýda. Basty maqsat 35 ýnıversıtet shoǵyrlanǵan megapolıs úshin ortaq ádistemelik usynymdardy ázirleý jáne standarttardy bekitý.
«Mysaly, joǵarǵy oqý ornynda stýdent úshin qandaı jaǵdaı jasalýy qajet? Stýdenttik jataqhana qandaı standarttarǵa saı bolýy shart? Múmkindigi shekteýli stýdentter úshin ınklúzıvti ortany qalaı qalyptastyramyz degen suraqtardyń jaýabyn izdep, birińǵaı qujat qabyldaıtyn bolamyz. Joba nátıjesi sátti bolǵan jaǵdaıda, bul bastamany respýblıka boıynsha júzege asyrýǵa bolady dep oılaımyn. Bastysy ýnıversıtet basshylyǵy osy ádistemelik usynymdardy qabyldaýǵa ázir bolýy shart», - dedi depýtat.
Aıta ketsek, osy ýaqytqa deıin jobalyq front-ofıstiń uıymdastyrýymen 40 eksperttiń basyn qosqan 5 fokýs-top otyrysy, 60 respondent arasynda anketalyq saýalnama, qazirgi tańda 500 respondentti qamtıtyn saýalnama júrgizilýde. Aldaǵy ýaqytta taǵy 4 dóńgelek ústel otyrysy uıymdastyrylatyn bolady. Búgingi kúnniń ózinde joba aıasynda 150-den astam usynymdar kelip tústi.