Qazaqstannyń Aqtaý qalasynyń mańynda oryn alǵan AZAL jolaýshylar ushaǵynyń apaty el júregin tebirentip, qaıǵyǵa batyrdy. Bul apatta 33 jastaǵy bortserik Hókúma Álıeva óziniń qyzmettik mindetin sońyna deıin adal atqaryp, erlikpen qaza tapty.
Apattan aman qalǵan jolaýshylardyń biri, Ekaterınbýrgten kelgen Sýbhonkýl Rahımov, Hókúmanyń apat sátinde kórsetken sabyrlyǵy men kásibı sheberligin erekshe atap ótti. Onyń aıtýynsha, Hókúma jolaýshylardyń qaýipsizdigin qamtamasyz etý úshin barlyq kúshin salyp, qıyn sátte de óz mindetin oryndaýdy jalǵastyrǵan.
"Ol óte qıyn jaǵdaıda, ásirese áıel adam úshin, erekshe batyldyq kórsetti. Onyń barlyq nusqaýlaryn oryndadyq, bul bizdiń ómirimizdi saqtap qaldy," – dep eske aldy Rahımov.
Hókúma Álıeva apat sátinde de sabyrly bolyp, jolaýshylardy tynyshtandyryp, olardyń qaýipsizdigin qamtamasyz etýge tyrysty.
Hókúma Álıeva 2016 jyldan beri «Azerbaıjan Hava Iollary» áýe kompanıasynda qyzmet atqardy. Ol bastapqyda aýdarmashy bolyp jumys istese, keıin bortseriktik qyzmetke aýysty. Áriptesteri onyń ashyq minezdi, meıirimdi jáne kásibı maman ekenin atap ótedi.
Hókúma – tek áýe salasynyń bilikti mamany ǵana emes, bilimdi tulǵa. Ol Baký memlekettik ýnıversıtetiniń zań fakúltetine 612 bal jınap, úzdik nátıje kórsetip túsken. Magıstratýra men doktorantýrany támamdaǵan soń, jaqyn kúnderi stúardessalyq qyzmetin aıaqtap, zańger retinde jańa jumysyn bastamaqshy bolǵan edi.
Hókúmanyń anasy Kámalá Álıeva qyzyn árdaıym maqtan tutqanyn aıtyp, bylaı dedi: "Ol kóp eldi kórip, árdaıym bizge: «Menimen maqtanyńyzdar» dep otyratyn. Buǵan deıin de ushaq apatqa ushyraı jazdaǵanyn aıtyp, bizdi sabyrǵa shaqyrǵan. Biraq bul joly qutqarylý múmkin bolmady."
Ákesi Djalıl Álıev te qyzymen maqtanatynyn jetkizdi: "Bul reıs onyń stúardessa retinde sońǵy saparlarynyń biri edi. Jaqyn kúnderi ol zańger retinde jumysyn bastaýǵa daıyndalyp júrgen bolatyn."
Hókúma Álıevanyń denesi Bakýde sońǵy saparǵa shyǵaryp salý rásiminen keıin Ekinshi Qurmet Aleıasynda jerlenedi. Bul oryn – Otan úshin erlikpen qyzmet etken adamdarǵa qurmet kórsetý orny.
Hókúmanyń erligi men adaldyǵy umytylmas estelik bolyp qalady. Ol qıyn jaǵdaıda adamdarǵa kómek qolyn sozyp, óziniń kásibıligi men adamgershiligin kórsetti. Bul onyń máńgi este qalatyn erlik joly.
"Erligimen el jadynda máńgi qalatyn jandar bar. Hókúma Álıeva – solardyń biri."