Halqymyzdyń tarıhynda erlerden qalyspaı atqa qonyp, jaýǵa japqan arýlar az bolmaǵany belgili. Olardyń izderi yqylym zamannan tarıh betinde saırap jatyr. Uly Otan soǵysynda oq atyp, elin jaýdan qorǵaǵan sholpan juldyzdarymyzdyń úzigin jalǵap, ózi ustaz, ári apa bolǵan qazaqtyń qaıratker qyzy - Shámsha Berkimbaevanyń esimi erekshe ataýǵa turarlyq. Elimiz óz aldyna derbes memleket bolyp, shańyraq kótergende alǵashqy bolyp qýanǵandardyń biri de osy Shámsha Berkimbaeva edi. Memleket jáne qoǵam qaıratkeri, burynǵy QR Bilim jáne ǵylym mınıstri, Parlament Senatynyń eks-depýtaty, Halyqaralyq pedagogıkalyq bilim berý akademıgi, uzaq jyldar qazaq qyzdarynyń quthanasy QyzPÝ-dy basqarǵan Shámsha Berkimbaevanyń táýelsizdikke qosqan úlesi erekshe.
Alashtyń ardaqty qyzy Shámsha Kópbaıqyzynyń bılikke kelgen baspaldaǵy tómennen bastaldy. Ol óziniń eńbek jolyn qatardaǵy qarapaıym muǵalimnen bastap, memleket qaıratkeri laýazymyna deıin júrip ótti. Sol jolda ultty uıystyryp, halqyn qoldaı bildi, erlerden qalyspaı, memleket isiniń bel ortasynda júrdi. Ult ardaqtylary D. Qonaev, A.Asqarov syndy saıası tulǵalarmen qatarlasa júrip, synnan súrinbeı, eseli eńbegin eline arnady. Tipti sol jolda óziniń pendege tıesili úlesin almaı, ultynyń múddesin joǵary qoıdy.
Ýaqyttyń qıyndyǵyna qaramastan alashtyń ardaqty qyzy el Táýelsizdiginiń nyǵaıýy jolynda eseli eńbek etti. Sodan da bolar Dımash Ahmetuly eń jaýapty jumysty qaǵilez qyzǵa senip tapsyryp, senim bildirip otyrǵan eken. Bálkim, Qonaevtyń kóregendigi Shámsha Kópbaıqyzynyń bıliktegi jolyn ashqan da shyǵar. Ol kisi Shámshanyń boıyndaǵy uıymdastyrýshylyq qasıetti erekshe baǵalaǵan eken. Aldyńǵy tolqyn aǵalary týraly eske alǵanda Shámsha apaı shabyttanyp, tebirenip ketetin.
«Dımash Ahmetulynyń senimine ıe bolýdyń ózi bir ǵanıbet qoı. Men úlken kisiniń qabyldaýyna júreksine kirip, jigerlenip shyǵatyn edim. Ol kisiniń taktıkasy qyzyq bolatyn, aldymen meniń pikirimdi tyńdaıtyn. Sosyn, kóńilinen shyqsa, rahattanyp kúlip alatyn. Báribir, úlken kisiniń mysy basyp, ishteı ýaıymdap turatynmyn. Biraq, meniń pikirimdi baǵalaýshy edi», - dep eske alatyn Shámsha Kópbaıqyzy.
Qazaq qyzdarynyń etalonyna aınalǵan, bolmysy bólek, bekzat jannyń taǵy bir qasıeti dostyqqa degen adaldyǵy. Ózi basshylyq etken oqý ordasynda alashtyń aıymdary Farıza, Kúláshpen jyr keshin uıymdastyryp, jıi kezdesý ótkizetin. Kezinde Farıza apaıdyń «Qyz ǵumyryna» án jazǵan Áset Beıseýov «bul ánniń keıipkeri Shámshá ekeni anyq sezilip tur» degen eken. Sol Farıza aqyn qaıtpas saparǵa attanǵanda aqtútek boranǵa qaramastan Astanany betke alǵan Shámsha «Fakeńe barmasam bolmaıdy. Ol kisimen qoshtaspasam, ózimdi eshqashan keshirmeımin» degen bir aýyz sózi qazaq qyzdarynyń bir-birine degen qurmeti emes pe. Mine, sol bir aıaýly jannyń kesek minezi men qaıtalanbas beınesi máńgi esimizde qaldy.
Ǵıbratty ǵumyr keship, shynaıy qurmetke ıe bolǵan jannyń qasıeti, iskerligi men qabileti týraly kóp aıtýǵa bolar edi... Óıtkeni, Shámsha Kópbaıqyzy óziniń iskerligi men qabiletiniń arqasynda san túrli salada, básekege qabiletti qoǵam qalyptastyrýda abyroımen eńbek etken jan. Qazirgi qoldanysqa engen «Pedagog mártebesi» týraly Zańdy alǵash bolyp qolǵa alǵan da osy Shámsha Berkimbaeva ekenin bireý bilse, bireý bilmes. Sáýleli de sanaly ǵumyryn jas urpaqty tárbıeleýge, ult múddesine qyzmet etýge, bilim men ǵylym salasyna arnaǵan zıaly jannyń sońynda, ózi aıtqandaı «İzgilikke toly joly» qaldy. Ol kisi únemi «men izgilikti izdep júrgen janmyn, áli de izdeýmen kelemin» dep jıi aıtýshy edi. Bálkim, ózi izdegen izgilikpen jolyqqan da shyǵar..