Stanıslav Kankýrov, Almaty qalasy máslıhatynyń hatshysy: Qazaq jerinde tabylǵan qarajat el ıgiligi úshin qyzmet etýi kerek

«Qazaqstan» telearnasyna bergen suhbatynda Memleket basshysy Qasym-Jomart Toqaev memleket pen qoǵamnyń damýyna jáne zaman talap etetin ózgeristerdi engizý jaıly naqty jáne tereń pikirler aıtty.

Qaıǵyly qańtar oqıǵasynyń sebepteri men saldarlary jan-jaqty jáne tereń zertteledi. Bul memleket pen qoǵam úshin úlken sabaq bolǵandyǵy tilge tıek etildi. Qazir tergeý barysynda árbir is boıynsha ádil sheshim shyǵarý kerektigin atap ótti. Bul Prezıdent úshin basty prınsıp bolyp qalady.

UQSHU áskeriniń ýaqytyly engizilgendigi jáne bul sheshim eshbir qaryzdarlyq emes, kerisinshe, UQSHU kelisimsharty aıasyndaǵy ózara kómek ekendigi málimdeldi. Odaqtas elder áskeri Qazaqstan ishindegi turaqtylyqty saqtaýǵa atsalysty.

Shekara men dostyq kórshilik te saraptaldy. Qazaqstan Reseımen máńgilik dostyq pen strategıalyq seriktestik jónindegi mańyzdy qujatqa qol qoıǵan. Eki el shekarasy zańdy túrde bekitilgen. Bul rette Prezıdent reseılik keıbir azamattardyń Qazaqstannyń soltústik oblystary Reseıge tıesili degen pikirdi qate oı dedi.

Qoǵamda qordalanǵan problema – halyqtyń áleýmettik jaǵdaıynyń tómen ekendigin bilemiz. Osy rette baılyqtyń basym bóligi kishigirim topta shoǵyrlanǵan. Bul problema tyńǵylyqty sheshiledi. Monopolıa men olıgopolıany joıý maqsaty qoıylǵan. Osymen birge zańsyz jolmen qol jetkizilgen jáne shetelge áketilgen qarajat elimizge qaıtarylatyn bolady. Prezıdent Úkimetke eki aı ishinde naqty usynystardy engizýdi tapsyrdy. Qazaq jerinde tabylǵan qarajat el ıgiligi úshin qyzmet etýi kerek.

Qasym-Jomart Kemeluly Almaty qalasyna erekshe toqtalyp ótti. Súıikti qalamyzdyń shabýyldan keıin qalpyna kelýi Prezıdenttiń jiti nazarynda. Qala basshysy retinde eńbekqor jáne tájirıbesi mol Erbolat Dosaevty osy maqsatta taǵaıyndady. Ákim aldynda qalany qalpyna keltirý, zardap shekken kásipkerler men azamattarǵa járdemdesý mindeti asa mańyzdy bolady. Almaty máslıhatynyń depýtattary bul arnadaǵy jumysqa belsendi aralasyp keledi jáne aldaǵy ýaqytta da bar kúshin salady.

Halqymyzdyń berekesin ulǵaıtý, Táýelsiz Qazaqstandy nyǵaıtyp, naqty ispen dáripteý mańyzdy. Biz Prezıdentimizdiń oı-tujyrymdaryn qoldaımyz jáne Jańa Qazaqstandy qurýǵa ortaq shoǵyrlanýymyz qajet dep esepteımin.