Mádenıet mınıstrligi «Ulttyq standarttarǵa sáıkes kelmeıtin QR Memlekettik Týy men Eltańbasyn aýystyrý jáne joıý qaǵıdalaryn bekitý týraly» buıryqtyń jobasyn kópshilik talqylaýǵa shyǵardy, dep habarlaıdy almaty-akshamy.kz
«Qosa berilip otyrǵan Ulttyq standarttarǵa sáıkes kelmeıtin Qazaqstan Respýblıkasynyń Memlekettik Týyn, Memlekettik Eltańbasyn aýystyrý jáne joıý qaǵıdalary bekitilsin. Buıryqtyń oryndalýyn baqylaý jetekshilik etetin QR Mádenıet jáne sport vıse-mınıstrine júktelsin», - delingen «Ashyq» NQA portalynda jarıalanǵan qujatta.
Málim bolǵandaı, endi Tý men Eltańbany aýystyrý jáne joıý kezinde myna erejeler saqtalýy tıis:
- Konstıtýsıalyq zańǵa sáıkes, QR Memlekettik Týy, Memlekettik Eltańbasy mindetti túrde ornalastyrylatyn (ornatylatyn, kóteriletin) memlekettik organdar men uıymdardyń turaqty komısıalary júzege asyrady.
- QR Memlekettik Týyn, QR Memlekettik Eltańbasyna qoıylatyn nysandardyń, mólsherdiń jáne tehnıkalyq talaptardyń buzylýy ulttyq standarttarǵa sáıkes kelmeý bolyp sanalady.
- Ulttyq standarttarǵa sáıkes kelmeıtin QR Memlekettik Týyn, Memlekettik Eltańbasyn aýystyrý 1 jumys kúni ishinde júzege asyrylady.
- QR Memlekettik Týyn, Memlekettik Eltańbasyn joıý olardy qaıta qoldaný múmkindigin boldyrmaý maqsatynda órteý, balqytý, 2,5 sharshy santımetrden aspaıtyn mólsherde bólshekteý, usaqtaý, qalypsyz massaǵa nemese untaq kúıge aınaldyrý jolymen júrgiziledi.
Buıryq jobasy 27 sáýirge deıin kópshilik talqylaýda bolady.