Jıyn Táýelsizdigimizdiń 30 jyldyǵy aıasynda uıymdastyrylǵan
Stambulda jańa oqý jylynyń bastalýyna oraı Túrkıaǵa Qazaqstannan bilim alýǵa kelgen stýdentter bas qosty, dep habarlaıdy Almaty-akshamy.kz.
Atalǵan jıyn Qazaqstannyń Stambuldaǵy Bas konsýldyǵynyń uıymdastyrýymen júzege asty. Júzdesýge Stambul, Bursa men Sakarıa qalalaryndaǵy stýdentter, Bas konsýl Álim Báıel, Bas konsýldyq dıplomattary qatysty.
Táýelsizdigimizdiń 30 jyldyǵy sheńberinde uıymdastyrylǵan jıynda jastar qazaq ánderin shyrqap, ulttyq oıyndar oınady. Tabıǵat aıasynda ótken kezdesýde stambuldyq stýdentter «Birlik» jastar uıymyn qurdy. Aldaǵy ýaqytta Bas konsýldyq osy uıymmen birge Táýelsizdigimizdiń 30 jyldyq mereıtoıyn túrik elinde keńinen atap ótpek.
Óz kezeginde Qazaqstan Elshiligi, QR Stambul Bas konsýldyǵy jáne QR Antalá konsýldyǵy pandemıadan keıin Túrkıaǵa qaıta oqýǵa kelgen jastarmen birlese otyryp, túrli joba men baǵdarlama uıymdastyrýdy josparlap otyr.