Bolashaq kartınanyń sújeti aqynnyń keńestik ıdeologıaǵa qarsy shyǵýyna negizdelgen
Almatyda «Jambyl. Jańa dáýir» fılminiń túsirilimi bastaldy. Kartına QR Mádenıet jáne sport mınıstrliginiń tapsyrysy boıynsha Ulttyq kınony qoldaý memlekettik ortalyǵynyń qoldaýymen shyǵarylady, dep habarlaıdy Almaty-akshamy.kz Baq.kz-ke silteme jasap.
Fılm aqıyq aqyn Jambyl Jabaevtyń týǵanyna 175 jyl tolýyna oraılastyrylǵan. Túsirilim tobyn rejıser Jandos Qusaıynov basqarady. Onyń shyǵarmashylyq qorjynynda «Álı» jáne «Shabdaly» kórkem fılmderi, sondaı-aq «Jaqsy adam», «Kóke» serıaldary bar.
Bolashaq kartınanyń sújeti aqynnyń keńestik ıdeologıaǵa qarsy shyǵýyna negizdelgen. Fılmde Jambyldyń ómirine áser etken aıtýly oqıǵalar qamtylady: aqyndar sleti, aqyn óleńderiniń gazet-jýrnaldarda jarıalanýy, Iosıf Gılmannyń Máskeýden kelýi, Jabaevtyń Oraz Jandosovpen, Baýyrjan Momyshulymen jáne dáýirdiń basqa da kórnekti qaıratkerlerimen kezdesýi kórsetiledi.
Basty róldi Qazaqstannyń Halyq ártisi Dosjan Janbotaev somdaıdy. Sondaı-aq, fılmge QR Halyq ártisi Dosqan Joljaqsynov, QR eńbek sińirgen ártisteri Erik Joljaqsynov pen Bekbolat Tileýhan, Qazaqstannyń eńbek sińirgen qaıratkeri Nurken Óteýlov, akterler Áset Imanǵalı, Asan Májıt, Qajymuqan Qalymbet jáne Erjan Nurymbet qatysady.
Negizgi lokasıalar – Almaty jáne Almaty oblysy. Qoıýshy operatory Erkinbek Ptyralıev («Boı Atbaıa», «Jeltaıa koshka»). Bıyl avtorlar 32 túsirilim aýysymyn júzege asyrýdy josparlap otyr. Fılmniń negizgi, sonyń ishinde aýqymdy kórinisteri kelesi jyly túsiriledi.
Kartınany túsirýmen «Mádenıet jáne shyǵarmashylyq bastamalardy qoldaý» Qoǵamdyq Qory aınalysýda. Avtorlar aty ańyzǵa aınalǵan Jambyl Jabaevtyń ómiri men shyǵarmashylyǵy týraly biregeı fılm qazaqstandyqtarǵa ǵana emes, sheteldik kórermenderge de qyzyqty bolady degen úmitte.
Esterińizge sala keteıik, bul Jambyl týraly alǵashqy kórkem fılm emes. 1952 jyly rejıser Efım Dzıgan «Qazaqfılm» stýdıasynda basty róldi Sháken Kenjetaıuly Aımanov somdaǵan «Jambyl» kartınasyn túsirgen.