Jaqynda «Alataý» dástúrli óner teatrynyń bir top akteri Túrkıanyń Stambýl qalasyndaǵy bilim jetildirý kýrsyna attanyp, Anadoly elinen erekshe sezimmen, shyǵarmashylyq shalqar shabytpen oraldy.
Bir ózinde 22 mıllıonǵa jýyq adam qonystanǵan, 3 myńnan asa meshiti bar, Bosfor teńizin jaılaǵan tarıhy kóne, jasampaz shahardyń qym-qýyt tirligi qyzyp jatyr. Óner mamandary úlken aýmaqty alyp jatqan Atatúrik atyndaǵy Mádenı ortalyqty tamashalap, 2 000 oryndyq opera teatry men 800 oryndyq drama teatrynyń akýstıkalyq-tehnıkalyq áleýetin sezinip qaıtty.
«Teatr akterleri dástúrli sahna ónerimen qatar munda akterlik sheberlikti nasıhattaıtyn Teyk sahna teatrynyń ustazdary – Seda Oǵýz, Berkýl Ýlýsoı, Ýtký Chetın syndy kıno jáne teatr akterlerinen «Qazirgi teatrǵa klasıkalyq pessalardy beıimdeý» taqyrybynda dáris tyńdap, keıipker qurýdan sheberlik sabaqtarynan óttik», – dedi qýanyshymen bólisken teatrǵa qarasty kórý jáne estý múmkindigi shekteýli azamattardyń mádenı demalysyn uıymdastyrý bóliminiń qyzmetkeri, tanymal jýrnalıs Gúljanat Shonabaı.
«Alataýdaı» jas teatrdyń aımańdaı akterleri – Dáýlet Arıpov, Áset Esjan, Dınara Tólepbergenova, Tımýr Pıazov, Esenaı Ilásov, «Ulytaý» tobynyń dombyrashysy Rústem Baıekeev túrik áriptestermen emen-jarqyn pikirlesip, ózara tájirıbe almasty. «El táýelsizdigi qarsańynda «Alataý» dástúrli óner teatrynyń qos birdeı dúldúli, daryndy akterler – Áset Esjan men Shattyq Ýatqan memlekettik «Daryn» jastar syılyǵymen, al bıshiler jetekshisi, horeograf Janna Jumabekqyzy QR Teatr qaıratkerleri odaǵynyń «Eńlikgúl» syılyǵymen marapattaldy! Sóıtip, Túrkıadan qaıtar kúni súıinshi jańalyqty estip, mereıimiz teńizdeı tasydy», - dedi uıymdastyrý bóliminiń qyzmetkeri.
Osynaý marapat jaýǵan qýanyshty kúni laýreattar áriptesteri aldynda marapattalyp, Stambýldaǵy 3 kúndik baıypty baǵdarlamany sátimen aıaqtaǵan azamattarǵa qurmetpen sertıfıkat tapsyryldy. «El asyryp, jer tanytyp, tanym-bilim kókjıegimizdi keńeıtýge múmkindik bergen «Alataý» teatrynyń ákimshiligine, Almaty qalasynyń mádenıet basqarmasyna úlken rızashylyǵymyzdy bildiremiz» deıdi mereıi tasyǵan teatr mamandary.