Qaldybaı Ábenovtyń jeke qory ashyldy
El táýelsizdigi merekesi qarsańynda Almaty qalasynyń memlekettik arhıvinde kınorejısser, senarıst, Qazaqstan Kınematografıster odaǵynyń múshesi, etnograf, 1989 jyly «Qazaqfılm» kınostýdıasynda «Jeltoqsan» qoǵamdyq uıymynyń negizin qalaǵan «Allajar», «Shákárim», «Jalańtós bahadúr» fılmderiniń avtory jáne qoıýshy-rejısseri Qaldybaı Torǵaıuly Ábenovtyń jeke qorynyń ashylýyna baılanysty «Qaıtpas, qaısar kınorejısser» atty eske alý sharasy ótti.
İs-sharany Almaty qalasynyń memlekettik arhıv dırektorynyń orynbasary Aısulý Isalova quttyqtaý sózben ashty. Ol óz sózinde qaıtpas qaısar kınorejısserdiń jeke qoryn jınaqtaýǵa jeltoqsanshy Erlan Dekelbaevtyń kóp eńbek sińirgenin jetkizdi. «Jaqsynyń jaqsylyǵyn aıt, nury tasysyn» demekshi, «Allajar» fılminiń keıipkeri bolǵan Erlan Ábdirashıtuly Qaldybaı aǵasynyń týǵan baýyryndaı ómir boıy janynda bolyp, aýyrǵanda qamqorlyq tanytyp, el basyna tóngen pandemıa kezinde dúnıe salǵan rejıserdiń jerleý rásimin uıymdastyryp, artynda qalǵan búkil muraǵatyn jaryqqa shyǵarý úshin ter tógip júrgenin erekshe atap ótkendi oryndy dep esepteımin. Sol eńbektiń jemisi – búgingi jeke qor kórmesine qosh keldińizder! – dedi Aısulý Mardeshqyzy.
Eske alý sharasyn belgili jýrnalıs, «Kazahskoe delo» toptamasynyń avtory Kólbaı Adyrbekuly júrgizdi. Sharaǵa qatysqan tarıh ǵylymynyń kandıdaty, alashtanýshy qalamger Beıbit Qoıshybaev, óner qaıratkeri, «Allajar» fılmi túsirilimi kezinde rejıserdyń asıstenti bolǵan QR Mádenıet qaıratkeri Ǵazızhan Ádilhanuly, jeltoqsanshylar – Erlan Dekelbaev, Kenjebaı Otarbaev, Kúnsulý Sharıeva, Álibek Muzaffar, Amandyq Ramazan, Qaldybaı Ábenovtyń ápkesi Altynkúl Ábenova, uly Farabı men basqa da qoǵam qaıratkerleri óz esteligimen bólisip, ıgilikti is-sharany uıymdastyrǵan arhıv qyzmetkerlerine rızashylyǵyn bildirdi.
Qaldybaı Ábenov jaıly júrek tebirenter estelikterden soń shákirti Erlan Ábdirashıtulynyń ustazyna arnaǵan beınejazbasy kórsetildi. Odan soń sharaǵa arnaıy shaqyrylǵan jeltoqsanshylar Jeltoqsan oqıǵasy kezindegi qazaq jastarynyń basynan ótken qıyndyqtary týraly aıtyp, memleketimizdiń táýelsizdiginiń qundylyǵyn taǵy bir aıqyndaı tústi. Arhıv qyzmetkerleri atynan arhıvtiń bas sarapshysy Láılá Qasymqyzy, jeke qorlardy jınaqtaý bóliminiń basshysy Aıgerim Áljanova kelgen qonaqtar men jeltoqsanshylarǵa alǵysyn bildirdi.