15 qyrkúıekte Soltústik Qazaqstan oblysynyń ákimdigi sý tasqynynan zardap shekken barlyq turǵyndy jańa jáne jóndeýden ótken turǵyn úılerge kóshirý jumystaryn aıaqtady.
Soltústik Qazaqstanda barlyǵy 1394 úı satyp alynyp, 1899 úı kúrdeli jóndeýden ótti. Petropavlda 700 úı salynyp, jańa «Birlik» shaǵyn aýdanyn qurady. Búginde munda taǵy 173 úıdiń qurylysy aıaqtaldy. Baspana kiltterin saltanatty túrde tabystaý rásimine Premer-Mınıstrdiń orynbasary Qanat Bozymbaev qatysty, dep habarlaıdy aqshamnews.kz Ónerkásip jáne qurylys mınıstrligine silteme jasap.
«Turǵyndarǵa tózimdilik tanytqany úshin jáne aımaqty qalpyna keltirýge atsalysqan barlyq bıznes ókilderine, atap aıtsaq, "Qazaqstan halqyna" qorynyń basqarma tóraǵasy Bolat Bıdahmetuly Jámishev, "Kazakhmys" korporasıasy dırektorlar keńesiniń tóraǵasy Edýard Vıktorovıch Ogaı, "Kaspi" kompanıasy dırektorlar keńesiniń tóraǵasy Vácheslav Konstantınovıch Kım, "KAZ Minerals Management" dırektorlar keńesiniń tóraǵasy Oleg Nıkolaevıch Novachýkke alǵys aıtqym keledi. Sizdersiz biz mundaı aýqymdy qurylysty 3,5 aıda bitire almas edik», — dedi Premer-Mınıstrdiń orynbasary.
Búginde jańa «Birlik» shaǵyn aýdanynda «Kaspi» kompanıasy balabaqsha qurylysyna demeýshilik etýde, 600 oryndyq mektep salý josparlanyp otyr. Jaqynda yqsham aýdanǵa asfált jol tóselip, avtobýs qatynaıtyn bolady.
«Búgin men kópten kútken úıdiń kiltin alǵanyma óte qýanyshtymyn. Bárimiz úshin bul tabıǵı apat óte qıyn tıdi. Alaıda, biz tózimdilik tanyttyq. Osy oraıda, elimizge, Memleket basshysyna, ákimdikke jáne qurylysshylarǵa, kúndiz-túni damylsyz jumys istep, úılerimizdi tez arada turǵyzýǵa atsalysqan barsha azamatqa alǵys aıtamyn. Men Oıqalada turdym, endi jańa úıde ómirdi tyń serpinmen jalǵastyramyz, buıyrsa mal men baqsham bolady», — dedi Alıma Jamankózova.
«Men kúlli Qazaqstan halqyna kórsetken kómegi men qoldaýy úshin sheksiz alǵysymdy bildiremin. Buǵan deıin Zarechnyı kentinde úlken otbasymmen 70 sharshy metrlik úıde turǵanbyz. Endi jańa aýdanda keń ári jaryq úıimiz bar. Búgin bárimiz óte qýanyshtymyz», — deıdi «Birlik» shaǵyn aýdanynyń turǵyny Dáýren Hamzın.
Soltústik Qazaqstan oblysynyń turǵyndarymen birge sý tasqynynan zardap shekken Batys Qazaqstan jáne Qostanaı oblystarynyń turǵyndary jańa jáne jóndeýden ótken úılerine tolyǵymen qonystandy.