2025 jyl Qazaqstanda Jumysshy kásipter jyly dep jarıalanǵany belgili. El Prezıdenti bul bastamanyń mańyzyn erekshe atap ótip, el ekonomıkasynyń keleshekte qajet etetin mamandaryn daıyndaýdyń strategıalyq rólin naqty kórsetken bolatyn. Soltústik Qazaqstan oblysy úshin bul bastama ózekti sıpat alyp otyr, sebebi óńirde aldaǵy jyldary iri taý-ken metalýrgıa jobalaryn iske asyrý josparlanyp otyr.
SQO ákimi Gaýez Nurmuhambetovtiń aıtýynsha, aımaqta bolashaqta taý-ken metalýrgıalyq kombınat salý kózdelip otyr. Qazirdiń ózinde «Syrymbet» olovo jáne «Aqsoran» vólfram ken oryndaryn ıgerý jumystary júrgizilýde. Bul – óńir ekonomıkasynyń jańa serpin alýyna múmkindik beredi. Sonymen qatar, jańa óndiristermen birge jumys oryndary ashylyp, bilikti mamandarǵa degen suranys artady.
Aımaq basshysy pedagogtardyń tamyz konferensıasynda atap ótkendeı, bir aı buryn Aıyrtaý aýdanyndaǵy agrotehnıkalyq kolej ben AO "Tin One Mining" kompanıasy arasynda memorandýmǵa qol qoıylǵan. Bul qujat negizinde kolejde taý-ken óndirisi mamandyqtary boıynsha oqytý bastalady. Stýdentter tek teorıalyq bilim alyp qana qoımaı, naqty óndiris oryndarynda praktıkadan ótip, bolashaqta suranysqa ıe kásibı maman retinde qalyptasady.
Aımaq basshysy dýaldy oqytý júıesiniń óńirde tıimdiligin dáleldegenin atap ótti. Mysal retinde, CLAAS zaýyty men TOO «Radýga» kásiporyndarynda oqyp júrgen stýdentter praktıka barysynda 200 myń teńgege deıin jalaqy alady jáne oqý bitirgen soń jumysqa ornalasý kepildigine ıe.
— Dál osy tásildi biz gorno-metallýrgıa salasyna da engizemiz, — dedi oblys ákimi.
G. Nurmuhambetov qabyldanyp jatqan sharalardyń negizgi maqsaty – jastardy suranysqa ıe mamandyqtarǵa oqytyp, olardy eńbek naryǵynda básekege qabiletti etý ekenin aıtty. Bul tásil bolashaqta Soltústik Qazaqstan oblysyn elimizdegi taý-ken metalýrgıa salasynyń jańa ortalyǵyna aınaldyrýǵa sep bolady.