Almaty qalasy Qoǵamdyq densaýlyq basqarmasy basshysynyń ýaqytsha mindetin atqarýshy Marat Pashımov megapolıstegi medısınalyq uıymdardy aralap shyqty.
Inspeksıa barysynda ol qalalyq klınıkalyq aýrýhanalardaǵy qaıta jańǵyrtý jumystarymen jáne emhanalardyń qyzmetimen tanysty. Onyń ishinde qylmystyq-atqarý júıesine qarasty mekemelerge qyzmet kórsetetin uıymdar da bar.
Negizgi nysandardyń biri – №4 qalalyq klınıkalyq aýrýhana. Munda ınfraqurylymdy jańǵyrtý jáne 400 myńnan astam turǵynǵa kórsetiletin medısınalyq kómektiń sapasyn arttyrý maqsatynda aýqymdy rekonstrýksıa júrip jatyr. Búginde aýrýhana táýlik boıy jumys isteıdi: jylyna 12,5 myńǵa deıin ota jasalady, al qabyldaý bólimine kúnine 300-ge jýyq naýqas júginedi.
Qurylys kezinde medısınalyq kómek úzilmegen: pasıentterge arnalǵan bólek marshrýttar uıymdastyrylǵan, angıograf apparatyna «jasyl dáliz» jumys isteıdi, ınjenerlik júıeler turaqty baqylaýda tur.
Sapar barysynda Marat Pashımov merdigerlermen kezdesip, qaıta jańǵyrtý barysyn turaqty baqylaýda ustap, medısınalyq mekemeniń úzdiksiz jumysyn qamtamasyz etýdi tapsyrdy.
Erekshe nazar №24 qalalyq emhanaǵa aýdaryldy. Bul emhana 2022 jyldan beri Almatydaǵy tergeý ızolátorynda jáne túzetý mekemelerinde otyrǵandarǵa medısınalyq kómek kórsetip keledi. Qalada osyndaı úsh mekeme jumys isteıdi — №72, №11 jáne №13. Olarda 2000-nan astam adam bar.
№72 mekemesine barǵan kezde Marat Pashımovqa zamanaýı medısınalyq bólim kórsetildi. Ol ÝDZ-nyń joǵary dáldikti apparatymen, rentgen jabdyǵymen, stomatologıalyq qondyrǵymen, flúorografpen, fetaldy monıtor jáne medısınalyq kómek kórsetýge arnalǵan defıbrıllátormen jabdyqtalǵan.
Munda 38 maman jumys isteıdi, onyń ishinde 17 dáriger bar. Medısınalyq bólimde klınıkalyq-dıagnostıkalyq zerthana, kúndizgi stasıonar, dárihana qoımasy jáne telemedısınalyq keńes ótkizý múmkindigi qarastyrylǵan.
Bul pasıentterge keń aýqymdy medısınalyq qyzmet kórsetýge jáne olardy mekemeden tys jerge shyǵarý qajettiligin azaıtýǵa múmkindik beredi.
Barlyq túzetý mekemelerinde jalpy praktıka dárigerleri kún saıyn qabyldaıdy, al tar beıindi mamandar aptasyna úsh ret qabyldaý júrgizedi.
Munda turaqty túrde profılaktıkalyq sharalar men skrınıngter júrgiziledi. Sapar qorytyndysy boıynsha Pashımov qylmystyq-atqarý júıesi mekemelerinde medısınalyq kómekti qamtamasyz etý jumysyn jalǵastyryp, profılaktıka baǵytyn jáne telemedısınany qoldanýdy kúsheıtýdi tapsyrdy.
Odan keıin Qoǵamdyq densaýlyq basqarmasynyń basshysy №20 qalalyq emhanaǵa bardy. Ǵımaratqa júrgizilgen kúrdeli jóndeýden keıin ol árleý jáne ınjenerlik jumystardaǵy birqatar kemshilikterge, sondaı-aq irgeles aýmaqty abattandyrýǵa qatysty máselelerge nazar aýdardy. Uıym basshylyǵyna anyqtalǵan barlyq kemshilikti fotofıksasıamen aktige engizip, belgilengen merzimde joıý tapsyryldy.
Jumys saparyna №7 qalalyq klınıkalyq aýrýhana da kirdi. Munda stasıonar korpýsynyń qaıta jańǵyrtý jumystary bastaldy, sonymen qatar emhanaǵa kúrdeli jóndeý júrgizilýde. Bul rette medısınalyq qyzmet kólemi qysqartylǵan joq.
Sapar barysynda Marat Pashımov merdiger uıymdarmen keńes ótkizip, onda aldaǵy rekonstrýksıanyń eskızdik jobalary tanystyryldy.
Ol jumys kestesin qatań saqtaýdy, oryndalatyn jumystardyń sapasyn qamtamasyz etýdi jáne eń bastysy — turǵyndarǵa kórsetiletin medısınalyq kómektiń qoljetimdiligi men sapasyn tómendetpeýdi tapsyrdy.
Eske sala keteıik, jobada ǵımaratty seısmıkalyq turǵydan kúsheıtý, komýnıkasıalardy jańartý, qaýipsizdik júıelerin jetildirý jáne paıdaly aýmaqty 2500 m²-ge ulǵaıtý qarastyrylǵan.
Birinshi qabat zamanaýı front-ofıske qaıta jabdyqtalady. Onda bólek kireberister qarastyrylyp, bul pasıentter úshin qolaıly jaǵdaı jasap, kelýshiler men personal aǵynyn bólýge múmkindik beredi.
Sondaı-aq №10 qalalyq emhanaǵa kúrdeli jóndeý júrgizýge arnalǵan jobalyq-smetalyq qujattama ázirleý aıaqtalyp keledi. Bul emhana Áýezov aýdanyndaǵy 60 myńǵa jýyq turǵynǵa qyzmet kórsetedi.
Bul uıymnyń ózinde otbasy jáne balalar densaýlyǵy ortalyǵy, áıelder konsýltasıasy, klınıko-dıagnostıkalyq bólimshe jáne keńeıtilgen fýnksıalary bar mobıldi brıgada jumys istep tur. №10 emhana boıynsha basqarma basshysy jobalyq-smetalyq qujattamany jedel aıaqtap, kúrdeli jóndeýdi bastaýdy tapsyrdy.
Almatydaǵy medısınalyq uıymdardy qaıta jańǵyrtý jáne damytý – Qoǵamdyq densaýlyq basqarmasynyń basty baǵyttarynyń biri. Bul is-sharalar medısınalyq kómektiń qoljetimdiligi men sapasyn arttyrýǵa, qoldanystaǵy mekemelerge túsetin júktemeni azaıtýǵa jáne qalanyń densaýlyq saqtaý júıesin halyqaralyq standarttarǵa jaqyndatýǵa baǵyttalǵan.