Qazaqstan Respublıkasynyń Eńbek kodeksínde eńbekaqy saqtalmaıtyn demalys 97-bappen retteledí.
BAQ.KZ-ke túsíníkteme bergen zańger Sabıra Salımovanyń aıtuynsha, mūndaı demalystyń ūzaqtyǵy da jūmys berushí men qyzmetkerdíń kelísímí arqyly anyqtalady.
Qazaqstan Respublıkasynyń Eńbek kodeksínde eńbekaqy saqtalmaıtyn demalys 97-bappen retteledí. Atalǵan bapqa sáıkes, eńbek sharty taraptarynyń kelísímí boıynsha, qyzmetkerdíń ótíníshí negízínde oǵan eńbekaqy saqtalmaıtyn demalys beríluí múmkín, - dep túsíndírdí zańger.
Yaǵnı zańnamada mūndaı demalysty qansha ret aluǵa bolatynyna nemese onyń ūzaqtyǵyna shekteu qoıylmaǵan.
Būl jerde bastysy – ekí taraptyń kelísímí. Degenmen, jūmys berushíníń mūndaı demalysty beruden bas tartuǵa qūqyǵy bar. Alaıda zańda jūmys berushí míndettí túrde eńbekaqy saqtalmaıtyn demalys beretín jaǵdaılar da qarastyrylǵan. Onyń ūzaqtyǵy 5 kúntízbelík kúnge deıín boluy múmkín, - deıdí Sabıra Salımova.
Būl jaǵdaılarǵa mynalar jatady:
neke qıyu;
balanyń dúnıege keluí;
jaqyn tuysynyń, sondaı-aq jūbaıynyń nemese onyń jaqyn tuystarynyń (aǵa-ínílerí, ápke-qaryndastary, ata-anasy, balalary, ájesí, atasy, nemerelerí) qaıtys boluy.
Sonymen qatar eńbek nemese ūjymdyq sharttarda kózdelgen ózge de jaǵdaılarda demalys beríluí múmkín.
2024 jylǵy mausym aıynan bastap jańa norma engízíldí. Endí tūrmystyq zorlyq-zombylyqtan zardap shekkenderge arnaıy áleumettík qyzmet kórsetetín ūıymdarda bolǵan kezeńde jūmys berushí eńbekaqy saqtalmaıtyn demalysty míndettí túrde ūsynuǵa tıís. Mūndaı demalystyń ūzaqtyǵy 30 kúntízbelík kúnnen aspaıdy.
Būl jaǵdaıda qyzmetker jūmys berushíge demalys merzímín kórsete otyryp, jazbasha habarlama beredí jáne arnaıy áleumettík qyzmetterdí kórsetu turaly kelísímsharttyń kóshírmesín qosa tapsyrady.