Qazaqstan sporttyq atý túrlerinen Djakartada birinshi oryn aldy.
Indonezıanyń Djakarta qalasynda sporttyq atý túrleri boıynsha álem kýbogy máresine jetti. Jyldyń alǵashqy baıraqty básekesi jerlesterimiz úshin jemisti boldy, dep habarlaıdy Almaty-akshamy.kz 24.kz-ke silteme jasap.
Ulttyq qurama qorjynyna 10 medal tústi. Onyń 3-eýi altyn. Atap aıtqanda, shymkenttik Nıkıta Chırúkın 25 metrden tapanshamen nysana kózdeýde aldyna jan salmady. Al, áıelder arasynda Arına Altýhova barlyq múmkindigin utymdy paıdalanyp, eń úzdik nátıjeni tirkedi. Buǵan qosa, qazaqstandyq qyzdar da komandalyq synda top jardy. Pnevmatıkalyq vıntovkadan nysana kózdeý básekesinde Aleksandra Le, Elızaveta Bezrýkova jáne Anastasıa Grıgoreva úshtigi qorǵaǵan bolatyn. Buǵan qosa, ulttyq qurama sportshylary 5 kúmis pen 2 qola jeńip aldy. Bul kórsetkish jalpykomandalyq esepte birinshi orynǵa kóterilýge múmkindik berdi.
Aıta keteıik, álem kýbogynyń qorytyndysy boıynsha jaqsy nátıje tirkegen sportshylarǵa reıtıntik upaılar taratyldy. Dál osy tizim keıin Parıj Olımpıadasynyń joldamalary sarapqa salynǵanda negizgi róldi atqarady.