Bıyl ınflásıa deńgeıin 9,5 paıyzdan asyrmaý qajet.
Úkimet basshysy Álıhan Smaıylov azyq-túlik baǵasynyń qymbattaýyna kimderdiń kináli ekenin aıtty, dep habarlaıdy Almaty-akshamy.kz
"Biz byltyr qajetti qordy jınaqtap aldyq. Sondyqtan kókónis ónimderi jaǵynan tapshylyq bolmaýy tıis edi. Ákimderge baǵany ustaý úshin qajetti tetikterdiń barlyǵyn berdik, qarjy da bólindi. Biraq baǵa báribir ósip jatyr. Ákimdikterdiń tıimdi jumysyn kórip otyrǵan joqpyn. Jergilikti jerlerde atalǵan máselege salǵyrt qaraýdyń saldarynan baǵanyń ósýi toqtaıtyn emes", - dedi Smaıylov Úkimettiń búgingi otyrysynda.
Osy oraıda Premer pıaz máselesin de eske saldy. Ákimderge aldyn ala kelisimshart jasaýǵa tapsyrma berilgen bolatyn. Biraq olar "pıaz jetkilikti" dep birneshe ret aıtqan.
"Onda pıaz nege qymbattap jatyr? Bizde pıaz kóp ósedi. Alaıda baǵany tómendetý úshin pıaz eksportyna tyıym salyp, shuǵyl sharalar qabyldaýǵa májbúr boldyq. Biz birinshi kezekte ónim óndirýshilerdi forvardtyq satyp alý mehanızmderin qaıta qaradyq. Alaıda ákimder jetkizýshilerge qarjy bólýdi doǵarmaı otyr. Ókinishke qaraı, ol deldaldardy kóbeıtkennen basqa nátıje berip jatqan joq", - dep atap kórsetti Úkimet basshysy.
Budan bólek, óńirlerge turaqtandyrý qorlaryn tıimdi baǵamen toltyryp alýǵa múmkindik berildi. Biraq tıimdi jumys kórinbeıdi. Al bıyl ınflásıanyń deńgeıin 9,5 paıyzdan asyrmaý qajet.
"Buǵan qol jetkizýge ábden bolady. Ol úshin tek barlyq óńirlerdiń azyq-túlik baǵasyn turaqtandyrý, ásirese, maýsymaralyq kezeńde baǵany ustap turý boıynsha belsendi jumysy qajet. Sizderde qajetti quraldardyń bári bar", - deıdi Smaıylov.