Qazaqstanda apatty jaǵdaıdaǵy 3,7 myń úı bar eken.

Eldiń 5 óńirinde turǵyn úı qorynyń joǵary tozýy saqtalyp otyr. Elimizde tozyǵy jetken jáne apatty jaǵdaıdaǵy 3,7 myń úı bar. Bul týraly Indýstrıa jáne ınfraqurylymdyq damý mınıstri Marat Qarabaev Úkimet otyrysynda habarlady, dep jazady Almaty-akshamy.kz.  inbusiness.kz. silteme jasap.

"Respýblıkanyń turǵyn úı qorynda tozyǵy jetken jáne avarıalyq jaǵdaıdaǵy 3,7 myń úı bar. Apatty turǵyn úı ıeleriniń máselelerin sheshý jáne eldi mekenderdiń sáýlettik kelbetin jaqsartý maqsatynda buzylatyn úılerdiń tizbesin aıqyndaı otyryp, qabyldanǵan renovasıalaý baǵdarlamalary ózektendiriledi. 2029 jylǵa 1 myń 500 úıdi buzý jáne 40 myń menshik ıesiniń turǵyn úı máselelerin sheshý josparlanyp otyr. Onyń ishinde bıyl 3 myńnan astam menshik ıesin qamtıtyn 120 kóp páterli turǵyn úı bar", - dedi mınıstr.

Marat Qarabaev kúrdeli jóndeýdi qajet etetin kondomınıým obektileriniń úlesi 32%-dan 31,1%-ǵa deıin tómendegenin atap ótti.

"Bes óńirde turǵyn úı qorynyń joǵary tozýy saqtalady. Atap aıtqanda, Abaı oblysynda – 67%, Batys Qazaqstan oblysynda – 63,9%, Aqmola oblysynda - 59,2%, Jetisý oblysynda – 52,6%, Almaty qalasynda – 52,4%. Respýblıkanyń 11 óńirinde 215 kóp páterli turǵyn úıge kúrdeli jóndeý jumystary júrgizildi", - dedi ol.