Qarjylyq monıtorıń agenttigi dene shynyqtyrý jáne sport salasyn damytýǵa bólingen memleket qarjysynyń urlanýynyń aldyn alý boıynsha jumys júrgizýde, dep habarlaıdy Almaty-akshamy.kz.
Agenttik málimetinshe, sporttyq-saýyqtyrý is-sharalarynyń, nysandardyń, qurama komandalardyń, buqaralyq sporttyq is-sharalardyń, federasıalardyń reıtıńisi men qaýipteri kórsetilgen tizbesi qalyptastyryldy. Sondaı-aq salany qarjylandyrýdyń joldary men kólemi, onyń ishinde demeýshilik kómek kólemin anyqtaý baǵytynda jumystar júrgizilip jatyr.
«2023 jyldyń 6 aıynda ǵana Agenttikte jalpy somasy 269,3 mln teńge zalaly bar 21 is tergelýde. Aıta keteıik, ashyq aqparat kózderinen alynǵan málimetterge sáıkes, 2019-2023 jyldar aralyǵynda sportty damytýǵa shamamen 300 mlrd teńge bólingen», - dep atap ótti vedomstvo ókilderi.
Agenttik taýarlar men qyzmetterdi joǵarylatylǵan baǵamen satyp alý, qyzmet kórsetýdiń naqty oryndalmaýy jáne basqa da zańbuzýshylyqtar boıynsha taldaý júrgizedi.
Júrgizilgen jumystardyń nátıjesinde sportty damytýǵa bólingen búdjet qarajatynyń urlanýyna jaǵdaı týǵyzatyn sebepterdi anyqtaý jáne mundaı zańbuzýshylyqtardyń aldyn alatyn tetikterdi jetildirý boıynsha usynystar ázirleý josparlanyp otyr.
QMA memlekettik búdjet qarajatyn jymqyrý úshin qylmystyq jaýapkershilik qarastyrylǵanyn eskertedi.