Ómir boıyna beriletin tólemdi taǵaıyndaý kezinde talap etiletin sportshynyń eńbek ótili ózgerdi.
Qazir ol 20 jyl bolsa, endi bul merzim 10 jylǵa deıin qysqarady, dep habarlaıdy Almaty-akshamy.kz QazAqparatqa silteme jasap.
«Qazirgi ýaqytta qoldanystaǵy zańnamada olımpıadalyq, paralımpıadalyq, sýrdlımpıadalyq oıyndardyń chempıondary men júldegerleri jáne olımpıadalyq sport túrleri boıynsha Álem chempıondary men olardyń jattyqtyrýshylary úshin ómir boıy aı saıynǵy tólem berý kózdelgen. Sonymen qatar, sportshylarǵa, olardyń jattyqtyrýshylaryna qoıylatyn talaptardyń biri - 20 jyldyq eńbek ótili. Alaıda, talaptardy naqtylaý maqsatynda QR azamattary sanalatyn sportshylar men olardyń jattyqtyrýshylary úshin eńbek ótiliniń barlyq kezeńi Qazaqstan aýmaǵynda eseptelgen bolýy tıis degen tolyqtyrý engizý qajet» delingen Mádenıet jáne sport mınıstrligi jarıalanǵan retteýshilik saıasattyń konsýltatıvtik qujatynda.
Sonymen qatar, vedomstvo joǵary jetistikke jetken sportshylar úshin eńbek ótilin 20 jyldan 10 jylǵa deıin qysqartýdy usynyp otyr.
«Qazaqstandyq sportshylardy eń joǵary kórsetkishterge qol jetkizýge yntalandyrý maqsatynda sportshylar úshin Qazaqstan aýmaǵynda dene shynyqtyrý jáne sport salasynda eńbek ótiliniń bolýy týraly talapty 10 jylǵa deıin tómendete otyryp, qaıta qaraý usynylady. Sonymen qosa, sporttyq nátıjelerdi taldaý nátıjesi shahmatta joǵaryda atalǵan sport túrlerine uqsas báseke óte úlken ekenin kórsetti. Osyǵan baılanysty sportshylar men olardyń jattyqtyrýshylaryn zıatkerlik sport túrleri boıynsha materıaldyq qamtamasyz etý Qazaqstannyń zıatker ultyn qalyptastyrýǵa yntalandyrady», - delingen Asqat Oralov jetekshilik etip otyrǵan vedostvonyń máseleleri kórsetilgen retteýshilik saıasattyń konsýltatıvtik qujatynda.