Zertteu Research Institute dırektory, ekonomıs Sholpan Áıtenova qazaqstandyq sportqa jumsalǵan qarjy kólemi men jalpy sporttaǵy sapa jóninde sóz etti, dep habarlaıdy aqshamnews.kz.
«Eger 1998 jyldan bergi kezeńdi qarastyratyn bolsaq, sportty qarjylandyrý kólemi 10 ese ósti. Alaıda bul elimizdiń olımpıadalyq sport túrlerindegi nátıjeleriniń aıtarlyqtaı jaqsarýyna yqpal etken joq», - dep jazady Sholpan Aıtenova.
1996 jyly búkil memlekettik búdjet nebári 280 mlrd teńge bolǵan kezde Qazaqstan 11 medal jeńip aldy, onyń úsheýi altyn boldy. London (2012) jáne Rıo (2016) olımpıadalary elimiz úshin tabysty boldy, onda bizdiń sportshylar sáıkesinshe 15 jáne 17 medal jeńip aldy.
«Biraq, keıinnen dopıng daýyna baılanysty medaldardyń bir bóligi bizden alynyp tastaldy, al keıbireýlerin basqa elde qalyptasyp, Qazaqstan azamattyǵyn alǵan sportshylar (2012 - 2, 2016 - 3, 2020 - 2) jeńip aldy. Olımpıada oıyndarynda jetistikterdiń óskeni baıqaldy, biraq bul mardymsyz jáne ásirese, legıoner sportshylardyń esebinen ósip otyr», - dep atap ótti Áıtenova.
Onyń pikirinshe, sońǵy 26 jylda memlekettik sport saıasatynda buqaralyq jáne olımpıadalyq sportty damytýdyń naqty strategıasy bolǵan joq. Biraq bul sportqa az qarjy bólindi degendi bildirmeıdi.
«Balalar men buqaralyq sportty ata-analar óz qaltalarynan qarjylandyrady, biraq ınfraqurylymdy jaqsartýǵa olardyń qarajaty jetpeıdi. Sondyqtan biz olımpıadalyq sport túrlerinen aıtarlyqtaı nátıjege jete almaı kelemiz, óıtkeni sporttaǵy qarjylandyrý nátıjege baǵyttalyp, uzaq merzimdi strategıalarǵa baılanysty júzege aspaıdy. 2020-2024 jyldar aralyǵynda Sportty qoldaý qory (Samuryq-Qazynanyń sportqa arnalǵan qorlarynyń operatory) olımpıadalyq sport túrlerin qoldaýǵa 10 mlrd teńge bóldi», - dep jazady Áıtenova.
Qarjy sarapshysynyń aıtýynsha, sportty qarjylandyrý týraly aqparattyń bárin ashyq túrde jarıalaý kerek. Sondaı-aq barlyq shyǵyndarǵa aýdıt júrgizý qajet: legıonerlerge qansha aqsha jumsaımyz, komandalardyń shyǵyndary jáne taǵy basqa.
Sport ınfraqurylymyna jáne onyń aımaqtardaǵy qajettilikterine aýdıt júrgizý, jergilikti búdjetterden kásibı fýtboldy qarjylandyrý qanshalyqty qajet ekenin túsiný keregin aıtady.