Premer-Mınıstr Oljas Bektenovtiń tóraǵalyǵymen ótken Úkimet otyrysynda otandyq taýar óndirýshilerdi qoldaý sharalarynyń jergilikti óndiristi yntalandyrýdaǵy róli talqylandy, dep habarlaıdy aqshamnews.kz
Ónerkásip jáne qurylys mınıstri Qanat Sharlapaevtyń baıandamasyna sáıkes, 2024 jyldyń birinshi jartyjyldyǵynda Qazaqstannyń óńdeý ónerkásibi 5,1%-ǵa ósti. Ósim qara jáne tústi metalýrgıa, hımıa, mashına jasaý salalary jáne jıhaz óndirisi sıaqty salalarda baıqaldy.
Otandyq óndiristi qoldaýdyń negizgi tetikteri retinde birqatar zańnamalyq ózgerister qabyldandy. Atap aıtqanda, memlekettik satyp alýda otandyq taýarlarǵa basymdyq berý, offteık-kelisimsharttar jasaý tetigin pysyqtaý, memlekettik búdjet esebinen salynatyn obektilerde qazaqstandyq óndiristiń taýarlaryn paıdalaný boıynsha baqylaý engizý sharalary qabyldandy. Sonymen qatar, jer qoınaýyn paıdalanýshylardyń satyp alýlarynda otandyq taýarlardy jetkizýge sharttar jasasý, tabıǵı monopolıalar sýbektileri úshin konkýrstyq ótinim baǵasyn tómendetý arqyly otandyq taýarlardy basym satyp alý talaptary belgilendi.
Mınıstr Sharlapaev bul sharalardyń nátıjesinde otandyq óndirýshilerdiń óndiris kólemi aıtarlyqtaı ulǵaıǵanyn atap ótti. Mysaly, «Radýga» JSHS qaǵaz ónimderin memlekettik satyp alýdyń arqasynda óndiris júktemesin 12%-dan 100%-ǵa deıin arttyrdy. Sondaı-aq, «Lakra» JSHS jáne «Marschall» JSHS memlekettik satyp alýlarǵa qatysý esebinen óndiris kólemin edáýir ósirdi. 2024 jyldyń sáýir aıynda iske qosylǵan «Metal Former» JSHS zaýyty «Jaıly mektep» jobasynyń arqasynda óndiristiń tolyq júktelýine qol jetkizip, 3,6 mlrd teńgege ónim óndirdi.
Bul sharalar otandyq óndiristi damytýǵa jáne onyń básekege qabilettiligin arttyrýǵa eleýli úles qosýda.