Almatyda «ALMA CUP 2023» jáne basqa da jastar saıystary qalaı ótti
Almatyda Respýblıka kúnin merekeleý aıasynda 5500-den astam adamdy qamtyǵan jastarǵa arnalǵan 20-dan astam is-shara uıymdastyryldy. Máselen, ótken demalys kúnderi joǵary oqý oryndarynyń stýdentteri arasynda «ALMA CUP 2023» týrnıri ótti, dep habarlaıdy Almaty-akshamy.kz
«Sport chempıonaty-qala stýdentteri arasynda eń tanymal sport túrlerin biriktiretin aýqymdy jobalardyń biri. Joba jastardyń sporttyq daıyndyǵyn jáne fýtbol, voleıbol, basketbol jáne kıbersport sıaqty sport túrlerine qyzyǵýshylyǵyn arttyrýǵa baǵyttalǵan», - dep atap ótti Almaty qalasynyń jastar saıasaty basqarmasy.
Voleıboldan júlde qory 1 200 000 teńgeni qurady. Onyń ishinde 600 000 teńge – erler arasyndaǵy, qalǵan 600 000 teńge – áıelder arasynda voleıbolǵa jumsaldy. Voleıboldan erler arasyndaǵy týrnırge megapolıstiń 22 joǵary oqý orny, áıelder arasynda – 14 joǵary oqý orny qatysty. Jarys oıyny 2 kúnge sozyldy, onyń qorytyndysy boıynsha áıelder voleıbol týrnırinde 1 oryndy QazSTA-nyń «ADK» komandasy ıelendi, 300 000 teńgeni jeńip aldy, 2 oryndy – QazSTA-nyń «Rahat» komandasy 200 000 teńgeni jáne 3 oryndy – QazUPÝ komandasy ıelenip, 100 000 teńgeni aldy. Erler arasyndaǵy týrnır nátıjesi boıynsha QazSTA komandasy 1 oryndy jeńip aldy, oǵan 300 000 teńge, 2 oryndy QazUÝ komandasy, 200 000 teńge, 3 oryndy QazUTZÝ komandasy ıelendi, 100 000 teńge kóleminde utys aldy.
«JAS SPEAK» pikirsaıys týrnıri barysynda Almaty jastary «Qazirgi Qazaqstandaǵy syn-qaterler men perspektıvalar» taqyrybyn talqylady. Fınalǵa 30-dan astam komandanyń 16-sy shyqty. Jeńimpaz «Led Zeppelin» fraksıasy boldy.
Sondaı-aq, Jaidarman Almaty «Qazaqstan KVN Odaǵy» jáne jastar saıasaty basqarmasymen birlesip «Alataý» dástúrli óner teatrynda «Almaty ákimi kýbogy» oıynyn ótkizdi. Baıqaý qorytyndysy boıynsha respýblıkanyń úzdik komandalary arasynda júldeli oryndarǵa: Almatydan «Energo» komandasy (3 oryn jáne 400 000 teńge), Taldyqorǵannan «Shapalaq» komandasy (2 oryn jáne 600 000 teńge) jáne Tarazdan «Jýaly» komandasy (1 oryn jáne bas júlde – 1 000 000 teńge) ıe boldy.
Bulardan basqa, Alataý aýdanynda NEET sanatynda jastar arasynda fýtboldan týrnır, qalanyń barlyq aýdandarynda jastar arasynda fýtboldan «JAS CUP» týrnıri jáne t. b. ótti.