Alyp shaharymyzdyń Naýryzbaı aýdanynda №188 mektep-gımnazıasynyń jańa sport alańy ashyldy. Zaman talabyna sáıkes jasalǵan sporttyq alań eki myńǵa jýyq oqýshyǵa arnaıy ázirlengen.
Qalalyq Bilim basqarmasynyń usynysymen, jergilikti búdjetten qarajat bólingen bolatyn. Jalpy kólemi 3200 sharshy metrdi quraıtyn alańda shaǵyn fýtbol, voleıbol jáne basketbol alańdarymen qatar, túrli jattyǵý qurylǵylary ornatylǵan. Sport alańynda oqýshylardyń basketbol, voleıbol, fýtbol, toǵyzqumalaq, shahmat, ústel tenısi, besasyq, asyq atý, jeńil atletıka jáne taǵy da basqa sport úıirmeleri tegin jumys jasaýda.
Sporttyq alańnyń ashylýyna aýdan ákimdigi, ata-analar, belgili sportshylar men ustazdar qatysty. Balalardyń salaýatty ómir saltyn ustaýǵa septigin tıgizetin alań bolaryna qonaqtar senim bildirdi. Osy oraıda, Naýryzbaı aýdany ákiminiń orynbasary Mıras Nysanalıev oqýshylardy quttyqtap, olardan úlken úmit kútetinin atap ótti.
«Bul mektep aýdanymyzdaǵy eń kıeli bilim ordalarynyń biri. Osy jerden qanshama bilimdi de, talantty jastarymyzdyń shyǵaryna senimdimiz. Barlyǵymyz biletindeı, sport – densaýlyq kepili. Bolashaqta densaýlyǵy myqty urpaq qalasaq, dál osyndaı sporttyq alańdar arqyly kóńil bólgenimiz jón bolar», – dedi M.Nysanalıev.
Ata-analar tarapynan da rızashylyǵyn bildirgenderdiń qarasy kóp boldy. Aldaǵy ýaqytta, balalaryn mekteptegi tegin úıirmege beretinderin aıtty. Belgili aqyn Aqberen Elgezektiń qyzy da dál osy mektepte bilim alady eken. Ol da óziniń jyly lebizin bildirip, óz pikirimen bólisken bolatyn.
«Bul mektepti men qatty jaqsy kóremin. Sebebi, meniń qyzym da osy mektepti unatady. Óte úlken, ári ádemi sporttyq alań ashylyp otyr eken. Endigi jerde mektepte salaýatty ómir saltyn ustanatyn oqýshylar kóbeıeri anyq. Bolashaqta dál osy mektepten, dál osy alańda ótetin sporttyq úıirmelerdiń arqasynda chempıondarymyz shyǵyp qalary anyq. Balalardyń arasynda sportty nasıhattaý, olardy sportqa baýlý óte mańyzdy», – dedi aqyn A.Elgezek.
Al oqýshylardyń qýanyshynda shek joq. Endi olar, ózderine unaıtyn sport túrlerimen jańa alańda shuǵyldana alady. Tipti qalasa tegin úıirmelerge qatysyp, ýaqyttaryn tıimdi paıdalana alady.
– Mektebimizde buryn-sońdy mundaı úlken sporttyq alań bolǵan emes. Oqýshylardyń bári dán rıza. Sebebi, qalaǵan sport túrlerimen aınalysa alady. Tipti, aralarynda bolashaq álem chempıony bolamyn dep otyrǵandar da az emes. Osyndaı sporttyq alań salyp bergeni úshin bárine alǵysymdy aıtamyn, – dedi mektep túlegi Alımnur Qadyrbaı.