Almatyda mektepke deıingi bilim berý uıymdaryna memlekettik bilim berý tapsyrysy boıynsha oryn sany 33 paıyzǵa artty.
Bıyl mektepke deıingi tárbıe men oqytýǵa memlekettik bilim berý tapsyrysy boıynsha jergilikti búdjet esebinen 7860 oryn (2023 jyly 5905 oryn bólingen) bólindi. Aǵymdaǵy jyldyń aqpan aıynda 72 jekemenshik balabaqshaǵa 3274 orynǵa memlekettik tapsyrysty ornalastyrýǵa konkýrs ótkizildi, osyǵan baılanysty jekemenshik balabaqshalarda memlekettik bilim berý tapsyrysy boıynsha oryn sany artty, dep habarlaıdy Almaty-akshamy.kz.
Mektepke deıingi tárbıe men oqytýdy, orta, tehnıkalyq jáne kásiptik, orta bilimnen keıingi bilim berýdi, sondaı-aq joǵary jáne joǵary oqý ornynan keıingi bilim berýdi jan basyna shaqqandaǵy normatıvtik qarjylandyrý ádistemesine sáıkes oqytýdyń kredıttik tehnologıasyn eskere otyryp, 2024 jylǵa arnalǵan jan basyna shaqqandaǵy qarjylandyrý kólemi jalpy balabaqshalarda 1510 teńgege deıin, arnaıy toptarda 2106 teńgege deıin, mektepaldy daıarlyq toptarynda 739 teńgege deıin ósti.
Alaıda, ata-ana tóleminiń - 25 000 teńge- mólsheri ózgergen joq.
Megapolıste barlyǵy 980 mektepke deıingi tárbıe men oqytý uıymy bar, olarǵa 84 797 bala (194 memlekettik, 786 jekemenshik balabaqsha) barady. Qazirgi tańda 701 jekemenshik mektepke deıingi uıym 45 430 orynǵa memlekettik tapsyrys bergen.
Memlekettik tapsyrys kólemin ulǵaıtý týraly qaýly jobasyn talqylaý úshin NQA portalynda ornalastyryldy. Qyzyǵýshylyq tanytqan azamattar jobany talqylaýǵa kelesi silteme arqyly qatysa alady: https://legalacts.egov.kz/npa/view?id=14998934