Qor CAPS Unlock Ortalyq Azıalyq saraptama ortalyǵyna aınalady.
28 jyldyq jumysynan keıin Soros-Qazaqstan qory CAPS Unlock (Central Asian Policy Studies) Ortalyq Azıadaǵy problemalardy sheshýge tıimdi amaldar usynýǵa arnalǵan saraptama-analıtıka habyna aınalady, dep habarlady Almaty-akshamy.kz informburo.kz-ke silteme jasap.
CAPS Unlock qoldanbaly zertteýler jasap, kúrmeýi sheshilmegen máseleler tóńireginde pikirtalastar uıymdastyrady. Onyń ishinde áleýmettik-ekonomıkalyq teńsizdik, sıfrlyq demokratıa, bilim berý, klımattyń ózgerýi, Ortalyq Azıanyń geosaıası jáne geoekonomıkalyq kelbeti sekildi salalar qamtylady. Sonymen qatar biregeılik, tarıhı estelik jáne aımaqtaǵy kolonıal ómirdiń saldary sekildi problemalar da nazarda bolady. Ortalyq tehnologıalyq tendensıalardy zerttep jáne eskerip, onyń mańyzdy salalarǵa yqpalyn boljaıdy.
«Ortalyq Azıa elderiniń bári muhıtqa shyǵa almaıtyny belgili: áıtse de bul bizdiń zertteýshilerdiń álemdik oılarǵa, debattar men sarapshylarmen pikir almasýǵa múmkindigin arttyrady degen senimdemiz. Osy maqsatta biz aımaqty alańdatatyn problemalar boıynsha táýelsiz zertteýlerdi alǵa jyljytyp, elderimizdegi ǵalymdar men mamandardy álemdegi basqa áriptesterimen biriktiremiz, sarapshylar arasynda onlaın jáne offlaın formatta pikirtalastar uıymdastarymyz», – dedi CAPS Unlock atqarýshy dırektory Aıda Aıdarqýlova.
Ortalyq zertteýleriniń taqyryptyq baǵyttary aımaqtaǵy ashyq qoǵamnyń damýy úshin mańyzdy máseleler boıynsha anyqtalady.
CAPS Unlock dıalog alańyn damytý, sapaly zertteýler júrgizý jáne usynys daıyndaý, sonymen qatar aımaqtaǵy saraptamalyq qaýymdastyqty nyǵaıtý arqyly Ortalyq Azıadaǵy ashyq qoǵam qurýdy qoldaýdy óziniń mısıasy sanaıdy.
Aımaqtyq analıtıkalyq ortalyq (think tank) qurý Ashyq qoǵam qorlar jelisiniń jahandyq ózgerýiniń bir bóligi sanalady. Qoldanbaly zertteýler, usynystar krızısti jáne post-krızıs kezeńdegi problemalardy sheshýdiń eń jaqsy jolyn tabýǵa baǵyttalǵan. Pandemıa, soǵys jáne basqa da faktorlardyń yqpalymen bolǵan jahandyq daǵdarys halyqtyń ómir sapasyna da áser etetini sózsiz jáne eń birinshiden halyqtyń osal tustaryna yqpal etedi. CAPS Unlock usynystary qoǵamnyń osy segmentteriniń quqyqtary men múddelerin qorǵaıdy.
Ortalyq BUU men EYDU sekildi halyqaralyq ınstıtýttarmen áriptes bolýǵa daıyn. CAPS Unlock aımaqta da, Eýropa, Soltústik Amerıka men Azıa elderindegi analıtıkalyq ortalyqtarmen de áriptestik ornatady.
Uıymnyń qamqorshylyq keńesine Qazaqstan, Qyrǵyzstan, Ózbekstan jáne Tájikstandaǵy bedeldi sarapshylar kirdi:
- Gúlnora Beknazarova, áleýmettanýshy, fılosofıa ǵylymdarynyń kandıdaty, «Zerkalo» QQ dırektory, Tájikstan;
- Juldyz Smaǵulova, PhD, fılologıa ǵylymdarynyń kandıdaty, KIMEP ýnıversıteti bilim berý jáne gýmanıtarlyq ǵylymdar fakúltetiniń dekany, Qazaqstan;
- Medet Túlegenov, PhD, saıasattanýshy, Ortalyq Azıa ýnıversıteti «Azamattyq qoǵam bastamalary» ortalyǵynyń bas ǵylymı qyzmetkeri;
- Iýlıı Iýsýpov, ekonomıs, Center for Economic Development dırektory, Ózbekstan.
Soros-Qazaqstan qory 28 jylda densaýlyq saqtaý, bilim berý jáne ǵylym, adam quqyqtaryn qorǵaý, memleket qarjysynyń ashyqtyǵy jáne eseptiligi, halyqtyń osal toptarynyń múddesin qorǵaý, baspasóz quraldaryn, ekonomıkalyq reformalardy qoldaý salalarynda grant retinde 100 mıllıonnan astam AQSH dollaryn bóldi.