Bul týraly Oqý-aǵartý mınıstriniń mindetin atqarýshy Ǵanı Beısembaev málim etti.
Premer-Mınıstr bilim mekemelerindegi qaýipsizdikti kúsheıtý týraly tapsyrǵan bolatyn, dep habarlaıdy Almaty-akshamy.kz.
Bul tapsyrmanyń oryndalý baryy qalaı júrgizilip jatqanyn Oqý-aǵartý mınıstri aıtyp berdi.
«Osy oraıda eldegi barlyq mekteptiń qaýipsizdigin tekserýdi tapsyrdym. Tekseris aıaqtaldy, ol jumysqa 162 monıtorıń toby qatysyp, 800-den astam adam tartyldy. Onyń arasynda İshki ister mınıstrligi, Tótenshe jaǵdaılar mınıstrligi, bilim basqarmasy men bizdiń mınıstrliktiń mamandary boldy», - dedi Ǵanı Beısembaev Úkimet otyrysynan keıin BAQ ókilderiniń saýalyna jaýap berip.
Onyń aıtýynsha, taıaýda mektepterdiń qaýipsizdik máselesi boıynsha tolyq aqparat daıyn bolady.
«Aldyn ala málimetke sáıkes, mektep kameralary men dabyl túımelerin shuǵyl basqarý ortalyǵyna tikeleı qosý boıynsha problema bar. Kelesi másele - qaýipsizdikti sapaly túrde qamtamasyz etý. Búginde atalǵan jumysqa qajetti somany bólý boıynsha keńes ótkizildi. 1 qyrkúıekte búkil bilim uıymdary 100% kúzet quraldarymen qamtamasyz etiledi», - deıdi mınıstrdiń mindetin atqarýshy.