Ásirese, kartop pen kúnbaǵys maıy baǵasy sharyqtaǵan.
Negizgi qajetti taýarlardyń baǵasy sońǵy 2,5 jyldan astam ýaqyt ishinde rekordtyq deńgeıde ósti, dep habarlaıdy aqshamnews.kz
Birinshi nesıe búrosynyń málimetinshe, 8-14 qańtar aralyǵynda áleýmettik mańyzy bar azyq-túlik ónimderiniń baǵasy 0,5%-ǵa ósti. Aldyńǵy ret osyndaı joǵary apta saıynǵy ósý 2022 jyldyń sáýir aıynda baıqalǵan bolatyn, sol kezde ÁMAT baǵasy naýryz aıyndaǵy anomaldy ósý kezeńinen keıin qalypty deńgeıge oralyp edi.
ÁMAT-tyń qymbattaýy 13 apta boıy jalǵasyp keledi. Bul, shynymen de uzaq ýaqytqa sozylyp otyr: sońǵy eki jyldyń mańyzdy kezeńderinde mundaı sozylmaly ósý baıqalmaǵan edi.
Jalpy alǵanda, 19 negizgi azyq-túlik óniminiń 10-y tutynýshylar úshin qymbattady. Eń qıyn jaǵdaı kartop pen kúnbaǵys maıynda: olardyń baǵasy shekten tys ósken.
"Kartoptyń baǵasy 4,7%-ǵa kóterildi. Bul ósim qańtar aıynyń ózinde ekstrımaldy bolyp kórinedi, bir aptanyń ishinde osyndaı joǵary kórsetkish óte sırek kezdesedi. Mysaly, 2015-2024 jyldar aralyǵynda qańtar aıynda kartoptyń ortasha baǵasy 2,9%-ǵa qymbattaǵan. Bul ósý maýsymdyq faktorlarǵa baılanysty emes ekenin túsiný qajet. Kartoptyń baǵasy dástúrli túrde mamyr jáne maýsym aılarynda qatty kóteriledi, sebebi kókónis saqtaý qoımalarynyń jetkiliksizdigi jáne qajetti klımattyq jabdyqtardyń joqtyǵy osy kezeńde kartoptyń buzylýyna ákep soǵady, bul óz kezeginde baǵanyń kúrt aýytqýyna sebep bolady", dep jazylǵan búro málimetinde.
Kúnbaǵys maıynyń baǵasy 1,8%-ǵa qymbattady (2022 jyldyń basynan beri eń joǵary kórsetkish). Bul — kóptegen taǵamdardyń negizgi ıngredıenti sońǵy 26 apta boıy úzdiksiz qymbattap jatyr, al buǵan deıin, 2023 jyldyń aqpanynan 2024 jyldyń shildesine deıin turaqty túrde arzandap kelgen edi. Eske salsaq, 2023 jyldyń aqpanynda kúnbaǵys tuqymdaryna eksporttyq baj salyǵy engizilgen bolatyn. Bul sharanyń maqsaty — jergilikti kúnbaǵys maıyn óndirýshilerge jetkilikti shıkizat qamtamasyz etý arqyly óndiristerin tolyǵymen júktep, baǵalardy tómendetý edi.
Qyzyqtysy, fermerlerdiń narazylyǵyna qaramastan, qazir baj salyǵy áli kúnge deıin kúshinde qalyp otyr jáne sol burynǵy deńgeıinde. Osylaısha, kúnbaǵys tuqymdarynyń eksporty azaıyp, kúnbaǵys maıynyń eksporty kerisinshe artty. Mysaly, 2024 jyldyń 11 aıynda kúnbaǵys tuqymdary eksporty ótken jylmen salystyrǵanda 34%-ǵa azaısa, kúnbaǵys maıynyń eksporty 22%-ǵa ósti.