Qazaqstanda ekotýrızm belsendi damyp keledi.
Mysaly, ótken jyly elimizdiń ulttyq saıabaqtaryna 1,7 mln adam kelgen, dep habarlady Almaty-akshamy.kz
Bul týraly «Tabıǵatqa qulaq sal» jańa ekologıalyq marshrýtynyń ashylýy kezinde Ekologıa, geologıa jáne tabıǵı resýrstar vıse-mınıstri Álıa Shalabekova málimdedi.
«Ulttyq statısıkanyń deregine sáıkes, ótken jyly ulttyq saıabaqtarǵa kelýshiler sany 1,5 mln adamdy qurady. Bul kórsetkishti 2020 jylǵy kórsetkishpen salystyrar bolsaq, 2021 jyly 40%-ǵa óskenin kóremiz. Bıylǵy 10 aıdaǵy derekterdi qarasaq, onda adam sany 1,7 mln-nan asqan. Bul - Qazaqstannyń barlyq 14 ulttyq parki boıynsha derekter», - dedi ol.
Vıse-mınıstr zańnamalyq deńgeıde Májiliste ulttyq park aýmaǵynda ekologıa zańyn buzǵandarǵa jazany qatańdatý týraly zań jobasy qaralyp jatqanyn atap ótti.
«Biz Prezıdenttiń tapsyrmasy boıynsha saıabaqtardy lastaý, rejımdi buzǵany úshin jazany arttyrý týraly usynys engizdik, aıyppuldardy eki esege arttyrdyq. Mysaly, buǵan deıin jeke tulǵalarǵa buzýshylyqtar úshin 10 AEK mólsherinde aıyppul salynsa, qazir 20 AEK-ke deıin ulǵaıtyldy. Ázirge bul zań Parlamentte qaralyp jatyr», - dedi Álıa Shalabekova.
Onyń aıtýynsha, búgingi kúni ulttyq saıabaqtarǵa kelýshilerge yńǵaıly bolý úshin onlaın tólem qoldanylady.
Ulttyq saıabaqtyń aýmaǵyna kirgende, kelýshiler ekinshi deńgeıli bankterdiń qosymshasy arqyly tóleı alady.
Álıa Shalabekova qoǵamdyq dárethanalar máselesine de toqtaldy.
Aıtýynsha, ulttyq saıabaqtar qoǵamdyq dárethanalardy kútip ustaý, qyzmet kórsetý boıynsha jospar qurǵan.
Búgingi tańda Ekologıa, geologıa jáne tabıǵı resýrstar mınıstrligi men Mádenıet jáne sport mınıstrligi birlesip, sanıtarlyq toraptardy kútip ustaýǵa jumsalatyn shyǵyndy 83 myń teńge kóleminde sýbsıdıalaý máselesin pysyqtap jatyr.
Spıker búgingi kúni kóptegen ulttyq parkterde týrısik marshrýttar ashylyp jatqanyn aıtty.
«Biz «Kólsaı kólderi» ulttyq tabıǵı parkinde «Tabıǵatqa qulaq sal» ekologıalyq marshrýtyn ashtyq. Eki apta buryn Katon-Qaraǵaıda ekomarshrýt ashyldy, sondaı-aq, Saıram-Ógem ulttyq parkinde ekojoldy abattandyrý jumysy aıaqtalyp qaldy. Altynemel men Sharynǵa baratyn marshrýttar salyndy. Olar kelýshiler úshin óte yńǵaıly. Bul jumystyń bári basqa saıabaqtarda da jalǵasady. Kelesi jyly shaǵyn ulttyq saıabaqtar - Qarqaraly, Buırataý, Kókshetaýdy abattandyramyz», - dedi Álıa Shalabekova.