Almaty oblysynda qusbegilikten dástúrli «Sonar» respýblıkalyq týrnıri ótti.
Jarys memleket jáne qoǵam qaıratkeri Dinmuhamed Qonaevtyń 110 jyldyǵyna oraı uıymdastyryldy. İs-sharaǵa Túrkıa, Qytaı, Mońǵolıa memleketterinen jáne elimizdiń ár aımaǵynan 15 komanda qatysty, dep habarlaıdy Almaty-akshamy.kz 24.kz-ke silteme jasap.
«Sonar» qusbegiler básekesi alǵash ret Almaty oblysynda osydan 24 jyl buryn bastaldy. Keıin aýqymy keńeıip, elimizdiń basqa oblystarynda ótetin boldy. Kóneden kele jatqan kóshpendi halyqtyń saıatshylyq ónerine jastardyń qyzyǵýshylyǵy arta túsken. Qusbegilik urpaqtan-urpaqqa jalǵasyp kele jatqan áýlettiń kenjesi - Aıdardyń jasy jetide. Bul jarysta Aıdardyń qarshyǵasy júldeli úshinshi orynnan tabyldy.
Ár qyrannyń samǵaýyn, qanat qaǵýyn, ańǵa túsýin tóreshiler qadaǵalap otyrdy. Saıatshylyq dástúrdi jalǵaýshy qarıalar syn-eskertpelerin aıtyp, aqyl-keńesterin beredi. Al elimizde saıatshylyqtyń jańǵyrýyna eleýli úles qosyp kele jatqan Baǵdat Muptekeqyzy jas qusbegilerdiń ósip kele jatqanyn aıtady. Sonyń ishinde qyzdardyń da bolǵanyna qýanyshty.
«Biraz qyzdar boı túzedi. Mońǵolıadan kelgen álem tanyǵan Aısholpan Nurǵaıypqyzy. Odan keıin ekinshi - Shyǵys Qazaqstan oblysynda Aızere degen qyzymyz segiz jasta. Búgin endi osy qusbegilikke keleshekte qolyna qyran qus qondyrmaǵan kúniń ózinde, uıymdastyrý jaǵyna qarasyn degen talaby óte joǵary. Bul bala qarshyǵa, ıtelgige júgirmeıdi. Ol búrkitpen bastaǵan qyz. Soǵan qaraǵanda keleshekte úlken nátıje kórsetedi ǵoı dep oılaımyn», - deıdi «Qyran» Federasıasy qoǵamdyq qorynyń atqarýshy dırektory Baǵdat Múptekeqyzy.
Úsh kún boıy ótken jarysqa 70 qyran qatysyp, jeteýi fınalǵa shyqty. Túlki men qarsaqqa tazy men búrkittiń qatar túsken sáti de boldy. Jeti búrkit arasyndaǵy syn eki saǵatqa sozyldy. Barlyǵy qashqan ańdy alysqa uzatpaı, tegeýrinde myqtap shegendedi. Al bas júldeni Astanadan kelgen qusbegi Kúntýǵan Serikbektiń búrkiti jeńip aldy. Budan bólek «Sonar» týrnırinde qarshyǵalar men ıtelgilerdiń syny men qumaı tazylar jarysy ótti. QR Qusbegilik federasıasynyń málimetinshe, 2024 jylǵy búkilálemdik «Kóshpendiler» oıynyn Almaty oblysynda ótkizý josparlanyp otyr.
Saıatshylyq ónerdi tamashalaýǵa kelgen kórermenderge ulttyq oıyndar kórsetildi. Jamby atýda qyzdar da mergendik tanytty. Atqa sheber minetin jigitter teńge ilip, aýdaryspaqqa qatysty. Teatrlandyrylǵan qoıylymda batyrlardyń shaıqasy sahnalandy. Bas júldege 1 mln teńge berildi. Jalpy, jarysqa qatysqan qusbeginiń eshqaısysy syılyqsyz qaıtpady. Arnaıy syılyqtar men alǵys hattar tabystaldy.