Jınalǵan aqsha aldymen jol ýchaskelerin jóndeý men kútip ustaýǵa jumsalady.
Bul týraly Indýstrıa jáne ınfraqurylymdyq damý mınıstrligi avtomobıl joldary komıtetiniń tóraǵasy Tólegen Abdýllın málim etti, dep habarlaıdy Almaty-akshamy.kz.
«Elimizdegi avtomobıl joldarynyń jalpy uzyndyǵy - 96 myń shaqyrym. Onyń ishinde 25 myń shaqyrym - jol respýblıkalyq mańyzy bar, al 71 myń shaqyrym - oblystyq jáne aýdandyq mańyzy bar jol. Respýblıkalyq mańyzy bar joldar Indýstrıa jáne ınfraqurylymdyq damý mınıstrligi avtomobıl joldary komıtetiniń qaramaǵynda. Memlekettik tapsyrma sheńberinde damytý jáne kútip ustaý jónindegi jumystardy uıymdastyrýdy operator «QazAvtoJol» ulttyq kompanıasy júzege asyrady. Oblystyq jáne aýdandyq mańyzy bar avtojoldardy, sondaı-aq kóshe-jol jelisi jergilikti atqarýshy organdardyń jaýapkershiliginde», - dedi Tólegen Abdýllın ortalyq komýnıkasıalar qyzmeti alańynda ótken baspasóz máslıhatynda.
Komıtet basshysynyń aıtýynsha, bıyl qoldanystaǵy 11 myń shaqyrymnan astam avtojolǵa qurylys-montajdaý jumysy júrip jatyr.