Jambyl oblysyndaǵy Jańa Jambyl fosfor zaýytyndaǵy (JJFZ) keleńsiz jaǵdaı aımaq basshysy Nurjan Nurjigitovtyń jeke baqylaýynda, dep habarlaıdy Almaty-akshamy.kz QazAqparatqa silteme jasap.
23 qarasha kúni saǵat 11:40 shamasynda atalǵan kásiporynnyń 200-ge jýyq qyzmetkeri hımıa zaýyty basshylarynyń biriniń áreketine narazylyq bildirgen. Jambyl oblysy ákimdiginiń eńbek ınspeksıasy basqarmasynyń málimetinshe, sonyń nátıjesinde «Qazfosfat» kásipornynyń jumysshylary arasynda túsinispeýshilik oryn alǵan. «Qazfosfat» JSHS sıfrlyq transformasıa bóliminiń basshysy áriptesterine qatysty dóreki sóılegen», - delingen resmı habarlamada.
Oqıǵa ornyna der kezinde barǵan Jambyl oblysy ákiminiń birinshi orynbasary Nurjan Kalenderov, oblys ákiminiń orynbasary Qanatbek Mádibek, oblys prokýrorynyń orynbasary Nurbek Ulasbekuly mekeme qyzmetkerlerimen kezdesip, túsindirý jumystaryn júrgizdi.
Qazirgi kezde «Qazfosfat» JSHS sıfrlyq transformasıa bóliminiń basshysy, Reseı azamaty áriptesterinen keshirim surady. Sonymen qatar ol qyzmetinen bosatyldy.
«Osy fakti boıynsha 20 erikti qyzmetkerden turatyn jumys toby quryldy. Top quramyna seh jetekshileri, kásipodaq ókilderi kirdi, olar ózekti máseleler boıynsha jumystar júrgizilýde. Qazirgi tańda kásiporyndaǵy jaǵdaı turaqty. Zaýyt shtattyq rejımde jumys istep tur», - dep habarlady vedomstvo.