Sý resýrstaryn basqarý júıesin damytý tujyrymdamasyna sý tasqynynyń aldyn alý jáne onyń shyǵyndaryn azaıtý jónindegi keshendi is-sharalar qosylady.
Memleket basshysynyń tapsyrmasy boıynsha Sý resýrstary jáne ırrıgasıa mınıstrligi qujatty qaıta qaraıdy.
Bul týraly QR Sý resýrstary jáne ırrıgasıa mınıstrliginiń resmı ókili Móldir Ábdýalıeva OKQ alańynda ótken brıfıńte málimdedi, dep habarlaıdy Almaty-akshamy.kz El.kz aqparatttyq agenttigine silteme jasap.
Spıker elimizdegi sý qoımalaryndaǵy jaǵdaıǵa da toqtaldy.
«Aqmola oblysynda eki iri sý qoımasy 100% toly. Munda sý tasqynynyń belsendi kezeńi ótti. Biraq Jabaı ózeniniń rettelmeıtin aǵynynyń artýyna baılanysty Atbasarda sý tasqyny jalǵasyp jatyr. Soltústik Qazaqstan oblysynda 2 iri sý qoımasy 100% toly, sý tasqyny jalǵasyp jatyr. Eki sý qoımasy da shtattyq kestege saı jumys istep tur, buzylý qaýpi joq. Osy ýaqytqa Petropavl qalasy shegindegi Esil ózeniniń deńgeıi – 1243 sm, bir táýlikte ol 103 sm-ge kóterildi. Mamandar sý ótkizý is-sharalaryn atqaryp jatyr. Jaǵdaı kúrdeli», - dedi spıker.
Aqtóbe oblysynda jaǵdaı turaqty. Shyǵys Qazaqstan oblysynda eki iri sý qoımasy boıynsha ortasha sý jınaý kórsetkishi 80%. Abaı oblysynda Shúlbi sý qoımasy 89%-ǵa toldy. Óńirde sý tasqyny jalǵasýda. Batys Qazaqstan oblysynda tórt iri sý qoımasynyń ortasha sý jınaýy 74%. Irekli sý qoımasynan jiberilgen sý áli Qazaqstannyń shekarasyna jetken joq. Bul sý 16-17 sáýirde keledi dep kútilýde. Qaraǵandy oblysynda 3 iri sý qoımasy 99%-ǵa toldy, óńirde sý tasqynynyń qaýipti kezeńi ótti. Jaǵdaı turaqty. Qostanaı oblysynda 2 iri sý qoımasynyń ortasha sý jınaý kórsetkishi 93%, sý tasqynynyń belsendi kezeńi ótti. Qaratomar sý qoımasy tranzıttik rejımde jumysyn jalǵastyrýda.