Bıyl qamba tolymdy, egin orymdy bolatyn syńaıly.
Byltyr bizdegi dıhandar 24 mln gektar jerge dán ekti. Jaýapty mınıstrlik, muny 2022 jylmen salystyrǵanda 652 myń gektarǵa kóp ekenin aıtyp, bórigin aspanǵa atqan edi. Biraq jıyn-terim jyldaǵydan aıtarlyqtaı az boldy. Sandardy sóıletsek, ótken jyly ónim 2022 jylǵa qaraǵanda 22 paıyzǵa kem jınaldy. Sebebi ala jazdaı qýańshylyq qos búıirden qysty.
Saladaǵy sarapshylar seldiń saldarynan jerdiń ylǵaldyly artýy múmkin, deıdi. Ásirese tasqyn júrgen aımaqtardyń eginshileri kóktemgi qarǵyn sý men kókten túsetin tamshyǵa kóp úmit artady, dep habarlaıdy Almaty-akshamy.kz 24.kz-ke silteme jasap.
«Bıylǵy myna tasqynnyń eginge endi zıany bolady dep ony qaıta ala alamyz? Kúzdik daqyldar zardap shekken joq jáne mynaý jerdiń ylǵaldylǵy bıyl jaqsy bolady dep, sosyn endi egistik jaqsy shyǵady ma dep oıdamyz», - deıdi Qostanaı oblystyq Aýyl sharýashylyǵy jáne jer qatynastary basqarmasynyń bas mamany Kenje Jumandyqov.
Eldegi agrosektordyń lokomatıvteri Qostanaı, Aqmola, Soltústik Qazaqstan oblystarynda egin maýsymy mamyrsyz bastalmaıdy. Sol sebepti bıylǵy tasqynnan keletin qaýip te, saldar da joq deıdi. Máselen, qostanaılyqtar bıyl 4 mln gektar jerge egin egýge nıetti. Soqasyn saılap, tehnıkasyn maılap otyr, mundaǵylar. Sáýirdiń sońynda dalalyq daıyndyq jumystaryn bastamaqshy. Soltústik Qazaqstandaǵy eginshiler de mamyrda dán tastaımyz deıdi. Olar da qar sýynyń moldyǵy qýańshylyqtan qutqardy degenge keltirdi. Bıyl óńirdegi meje - 4,5 mln gektar alqapqa dán sebý.
«Elimizde oryn alyp otyrǵan jaǵdaıǵa baılanysty jumys ýaqyty ózgermeıdi. Qazir barlyǵy baqylaýda. Kóktemgi dalalyq jumystardy baqylaý úshin jedel shtab quryldy. Týyndaǵan problemalar jedel túrde sheshileýde. Bıyl 4 mln tonnadan astam astyq jınaımyz degen maqsatymyz bar. Taǵyda aıtqym keledi sý tasqyny egin eshqandaı kedergisi joq. Qaıta jer ylǵaldylyǵy artsa egin mol bola ma degen boljam bar», - deıdi SQO Aýyl sharýashylyǵy jáne jer qatynastary basqarmasynyń basshysy Meıram Meńdibaev.
Degenmen, úmit pen kúdik qatar. Byltyr aýyl sharýashylyǵy mamandary "keler jyly 2,5 mln gektar alqapty shegirtke basady" dep kúdiktengen edi. Endigi qaýip sol ǵana. Dıhandardy da tek osy másele ǵana alańdatady.