Soltústik Aralǵa jyl basynan shamamen 2 mlrd tekshe metr sý jiberildi
2024 jyldyń basynan Soltústik Aral teńizine 1,9 mlrd tekshe metr sý jiberildi. Osylaısha, búginde Soltústik Araldaǵy jalpy sý kólemi 22 mlrd tekshe metrge jetti, dep habarlaıdy aqshamnews.kz.
Bul týraly Halyqaralyq Araldy qutqarý Qory Basqarmasynyń otyrysynda Sý resýrstary jáne ırrıgasıa mınıstri Nurjan Nurjigitov málimdedi. Aıta keteıik, otyrys Tájikstan, Túrikmenstan, Ózbekstan jáne Qyrǵyzstannan kelgen delegasıalardyń qatysýymen ótti.
«Ózderińiz biletindeı, búgingi tańda Prezıdentimiz Halyqaralyq Araldy qutqarý Qorynyń basshysy bolyp saılandy. Qordyń tóraǵasy retinde bizdiń elimizge úlken jaýapkershilik júktelgen jáne biz Ortalyq Azıanyń basqa memleketterimen tyǵyz qarym-qatynasta bolamyz. Birlesip Aral teńizin saqtaý boıynsha eleýli nátıjelerge qol jetkizdik jáne osy baǵyttaǵy jumysty ári qaraı jalǵastyrýǵa nıettimiz. Bıyl Soltústik Aralǵa turaqty túrde sý keledi. Sýarý kezeńiniń ortasynda Syrdarıa ózeni arqyly teńizge sekýndyna 80 tekshe metrge deıin sý jiberildi. Salystyrmaly túrde, bir jyl buryn sekýndyna 6 tekshe metr ǵana barǵan bolatyn. Sońǵy jyldary Soltústik Aralda sý kólemi tómendedi, biraq 2024 jyldyń basynan sý deńgeıi qaıta kóterile bastady jáne búginde 22 mlrd tekshe metrge jetti. Soltústik Aralda sý kóleminiń odan ári ulǵaıýyn qamtamasyz etý úshin biz sý dıplomatıasyn kúsheıtip, Soltústik Aral teńizin qalpyna keltirý jónindegi jobanyń ekinshi kezeńin ázirlep jatyrmyz», – dedi Sý resýrstary jáne ırrıgasıa mınıstri Nurjan Nurjigitov.
Sonymen qatar, qatysýshylar Qazaqstannyń 2024-2026 jyldary HAQQ tóraǵalyq etý kezeńine arnalǵan Atqarý komıtetiniń jumys josparyn bekitti. Qujat quryltaıshy memleketterdiń basshylary men HAQQ Prezıdentiniń tapsyrmalaryn iske asyrý, Qordyń uıymdyq qurylymy men sharttyq-quqyqtyq bazasyn jetildirý jáne t.b. máseleler boıynsha 10 baǵyttan jáne 40-tan astam is-sharadan turady.
Esterińizge sala keteıik, Astanada Qazaqstannyń tóraǵalyǵymen Halyqaralyq Araldy qutqarý Qory Basqarmasynyń birinshi otyrysy ótti. Jıynǵa QR Premer-Mınıstri Oljas Bektenov, QR Premer-Mınıstriniń orynbasary Qanat Bozymbaev, HAQQ Atqarý komıtetiniń tóraǵasy Asqat Orazbaı, Tájikstan Respýblıkasy Premer-Mınıstriniń orynbasary Sýlaımon Zıózoda, Túrikmenstan Mınıstrler Kabıneti Tóraǵasynyń orynbasary Tangrykýlı Atahallyev, Ózbekstan Respýblıkasy Prezıdentiniń keńesshisi Shýhrat Ganıev qatysty.
Aıta keteıik, Syrdarıa ózeni aǵynynyń 75%–y Qyrǵyzstanda, 20%–y Ózbekstanda jáne 5%-y Qazaqstanda qalyptasady.