Venadaǵy Atom energıasy halyqaralyq agenttigi bas konferensıasynyń 68-shi sesıasy aıasynda Qazaqstan pavılony ashyldy, dep habarlaıdy aqshamnews.kz.
Saltanatty sharaǵa agenttiktiń bas dırektory Rafael Grossı Qazaqstannyń Venadaǵy halyqaralyq uıymdar janyndaǵy Turaqty ókili, elimizdiń Avstrıadaǵy Elshisi Muhtar Tileýberdi jáne Energetıka mınıstri Almasadam Satqalıev qatysty.
Kórme beıbit atom energetıkasyn damytýǵa, elimizdiń jahandyq ıadrolyq qaýipsizdikke qosqan úlesine jáne ýrannyń turaqty jetkizilimin qamtamasyz etýge arnalǵan. Qazaqstan pavılonynyń ashylýynda «Qazatomónerkásip» ulttyq kompanıasy ınovasıalyq ónimderimen tanystyrdy. Olar tabıǵı ýran konsentrattarynyń biregeı derekqoryn qamtıdy.
Sarapshylardyń pikirinshe, bul osy strategıalyq resýrstyń aınalymy men qaýipsizdigin baqylaýdy arttyrýǵa, sondaı-aq ıadrolyq jáne radıoaktıvti materıaldardyń zańsyz aınalymyna qarsy turýǵa múmkindik beredi. Sonymen qatar Iadrolyq fızıka ınstıtýtynda eldegi atom qaýipsizdigin qamtamasyz etý sharalaryn kúsheıtetin ıadrolyq sot-saraptamalyq zertteýler zerthanasy jumys isteıdi.
- Osy konferensıa barysynda Qazaqstannyń ıadrolyq qaýipsizdikti qamtamasyz etýdegi eleýli jetistikteri jáne halyqaralyq naryqtarǵa ýrandy turaqty jetkizýdi qamtamasyz etý turǵysynan jahandyq energetıkalyq qaýipsizdikti qamtamasyz etýge qosqan úlesimiz atap ótildi. Jalpy ýran ken oryndaryn ıgerýde biregeı tájirıbesi bar, halyqaralyq naryqqa ýran ónimderin turaqty jetkizýshi bedeline ıe Qazaqstannyń atom ónerkásibin damytýda zor áleýeti bar dep aıta alamyz, - dedi QR Energetıka mınıstri Almasadam Satqalıev.
Qazaqstan pavılonyn aralaǵan Atom energıasy jónindegi halyqaralyq agenttiktiń bas dırektory Rafael Grossı elimizdiń atom energetıkasyn damytýda sheshýshi ról atqaratynyn aıtty. Ol Qazaqstannyń orasan zor resýrstary men ınovasıalyq bastamalary agenttiktiń jumysyna eleýli úles qosyp otyrǵanyn jetkizdi. Sondaı-aq Grossı Qazaqstannyń tómen baıytylǵan ýran bankin ornalastyrýdaǵy ornyn erekshe atap ótti.
- Qazaqstannyń búkil álemdik ıadrolyq qoǵamdastyqta atqaratyn mańyzdy rólin atap ótý – men úshin úlken mártebe. Biz yntymaqtastyǵymyzdy, ásirese taza ıadrolyq energıany damytý baǵytyndaǵy qarym-qatynasymyzdy joǵary baǵalaımyz. Atom energıasy jónindegi halyqaralyq agenttik osy mańyzdy ótpeli kezeńde Qazaqstandy qoldaýǵa daıyn, dep habarlaıdy Atom energıasy halyqaralyq agenttiginiń bas dırektory Rafael Grossı.
Rafael Grossı ıadrolyq qoǵamdastyqty jáne Qazaqstandy kórmede usynylǵan jetistikterimen quttyqtap, yntymaqtastyqty odan ári jalǵastyrýǵa daıyn ekenin bildirdi.