Qoljazbalar jáne sırek kitaptar ulttyq ortalyǵy «Arhıv 2025» baǵdarlamasy aıasynda Fransıadan tabylǵan Qazaqstan tarıhyna qatysty qundy qoljazbanyń kóshirmesin jarıalady.
Fransıa Ulttyq kitaphanasynda saqtalǵan «Tańdamaly shejireler» tarıhı shyǵarmasy hıjranyń 816 jyly / ıaǵnı 1413 jyly Shırazda jazylǵan. Iaǵnı, bul shyǵarma XV ǵasyrǵa tán. Parsy tilinde arab jazýymen jazylǵan kitap 15 taqyryp boıynsha 15 taraýdan turady. Kitap 413 betti quraıdy. Atap aıtqanda, kitapta Aq Ordaǵa tolyq sıpattama berilip, Aq Orda handarynyń bıliginiń tolyq hronologıasy qamtylǵan. Sondaı-aq, Aq Orda bıleýshileriniń aty-jóni, ákeleri men shesheleriniń aty-jóni jáne jerlengen jerleri týraly qundy keste berilgen.
Kitapta Altyn Ordanyń Kók jáne Aq Ordalarǵa ydyraý kezeńi sıpattalǵan. Sonymen qatar, Syǵanaqta Aq Ordanyń 10 bıleýshisi jerlengeni týraly da aıtylady.
Mýın ad Dın Natanzı XIV ǵasyrdyń ekinshi jartysynda Isfahan mańyndaǵy Natanz aýylynda (Iranda) dúnıege kelgen. Davlatshah Samarqandıdiń «Tazkırat ash-shýaro» («Aqyndardyń ómirbaıany») shyǵarmasyna sáıkes, XV ǵasyrdyń basynda Mýın ad Dın Natanzı Shırazda Myrza Iskander (Ámir Temirdiń nemeresi) saraıynda turdy jáne Haıdar Horezmı, Hafız Horezmı jáne t. b. sıaqty aqyndardyń zamandasy bolǵan.
Esterińizge sala keteıik, bıyl elimizde Joshy ulysynyń 800 jyldyǵy atap ótilýde.