QR Parlamenti Senaty Halyqaralyq qatynastar, qorǵanys jáne qaýipsizdik komıtetiniń tóraǵasy Muhtar Qul-Muhammed Reseıdiń telearnasynda Solovev júrgizgen baǵdarlamadaǵy reseılik sarapshylardyń sózderine túsinikteme berdi, dep habarlaıdy Almaty-akshamy.kz.
«Sumyraı Solovev álemniń kóptegen elderinde burynnan non grata alǵan adam bolatyn jáne qazir búkil jerdegi sanksıalyq qara tizimderde kósh bastap keledi. Sondyqtan yza-kektiń býynan ol eldiń bárine jarmasyp «ýly silekeıin» shashyp júr. Buryn «Rossıa 1» arnasynda ol Almatyǵa bomba «tastap jiberý» týraly da aıtqan bolatyn. Baǵdarlamanyń qonaǵy – Memlekettik Dýmanyń depýtaty Onıshenko da odan qatty shoshynyp qalǵan edi», - dedi Muhtar Qul-Muhammed.
Sondaı-aq, ol Solovevtiń barshany jek kórýi kesirinen kóbinese ózeýrep ózi sóılep, baǵdarlamanyń meımandaryn janjal men arandatýǵa ıtermeleıtinin atap ótti. Onyń bári tikeleı efırde jáne esýas keıpinde bolatynyn tilge tıek etti.
«Reseılik saıasattanýshy Drobnıskııdiń «kelesi másele Qazaqstan bolýy múmkin. Óıtkeni ultshyldyq úrdisteri sol jerde de bastalýy yqtımal» degen sózinen bizdiń elimizge tikeleı qater tóndirý anyq baıqalyp otyr.
Eger ol Eýrazıalyq ekonomıkalyq odaq pen UQSHU-da bizben birge turǵan ózimizge dos Reseıdiń memlekettik arnasynyń efırinde kórsetilmese, dúdámal sarapshy-fantast Drobnıskıı-Jýkovtyń pikirine nazar aýdarmas edik. Reseılik saıasatkerlerdiń osyndaı ekpindi, maqsatty shabýyldary Solovevtiń shoýynda burynnan júıeli túrde jalǵasyp kele jatqandyqtan, olar Reseı Federasıasynyń federaldy bıligi tarapynan obektıvti jaýapqa laıyq», - dep baǵa berdi Halyqaralyq qatynastar, qorǵanys jáne qaýipsizdik komıtetiniń tóraǵasy.
Sóz sońynda Muhtar Qul-Muhammed Qazaqstan 30 jyldan astam ýaqyt boıy táýelsiz memleket ekenin, Solovev pen sol sekildi saıasatkerlerdiń shynaıy shyndyqty túsinip, jańa geosaıası aqıqatpen sanasýdy úırenetin ýaqyt kelgenin atap ótti.
Aıta keteıik, joǵaryda aıtylǵan reseılik saıasattanýshy Drobnıskııdiń «Kelesi másele Qazaqstan bolýy múmkin. Óıtkeni ultshyldyq úrdisteri sol jerde de bastalýy yqtımal» degen pikiri «Rossıa 1» arnasyndaǵy Solovevtiń shoýynda aıtylǵan bolatyn.