Olar - shynaıy mahabbattyń sımvoly. Eldiń sózi men kóptiń oıyn elemeı, tek júrekterindegi senim men sezimge súıenip, ómirdiń synaǵyn birge eńsergen jandar. Arýjan men Dinıslam - syrt kózge erekshe, biraq bir-birine degen mahabbatymen naǵyz otbasynyń ne ekenin dáleldegen jup. 15 qyrkúıek - Otbasy kúni qarsańynda Aqshamnews.kz tilshisi berik sezimge qurylǵan januıanyń áńgimesin usynady.
Bár qalaı bastaldy?
Arýjan – Túrkistan qalasynyń týmasy. Ol bala kúninen ómirge qushtar bolyp ósken. Biraq taǵdyr oǵan erte jasta aýyr synaq jiberdi.
"Jaraqatym 2009 jyly kúz aıynda dene shynyqtyrý sabaǵynda abaısyzda tizemen qulap, aýyrtyp alýdan bastaldy. 2 aı gıpste jattym. Túrkistandaǵy dárigerler dıagnozdy bilmegendikten Shymkentke jiberdi, olar da anyqtaı almaı Almatyǵa joldady. Almatydaǵy dárigerler birden onkologıa ekenin bildi de, aýrýhanaǵa jatqyzdy. 3 hımıa alǵan soń aıaǵym jaramaı qaldy, kesýge týra keldi. Sóıtip 8 hımıa alyp, aýrýymdy jeńip shyqtym. Naqty dıagnozym – súıek tinderiniń jaraqaty. Qazir men Túrkistan qalasynda nail master bolyp jumys isteımin" dedi ol.
Dinıslam men Arýjannyń tanystyǵy
Arýjan óziniń ómirlik serigi Dinıslammen áleýmettik jelide tanysqan.
"Jubaıymmen Instagram jelisinde tanystyq. 2022 jyly 1 naýryz kúni meni qurbymnyń storısinen kórip, maǵan jazdy. Solaı tanysyp kettik. Qazirgi tańda ol ıpotekalyq broker bolyp jumys isteıdi, kezekpen jáne kezeksiz tıimdi baǵamen úı alýǵa kómektesedi. Biz 2023 jyldyń 15 naýryzynda shańyraq kóterdik" dedi.
"Ol aıaǵym týraly eshteńe suramady"
Jas kelinshek úshin Dinıslam – tek jubaı emes, senimdi dos ári tirek.
"Maǵan ol joldas qana emes, eń jaqyn syrlas dos, janymnyń tynyshtyǵy, tiregim. Ol – senimdi serik, árqashan qasymnan tabylǵan myqty adam. Jaqsy áke, adal jar, otbasymyzdyń tiregi. Jubaıym óte sabyrly, salmaqty, ýádesinde turatyn er azamat. Biz birinshi kezdeskende ol “kelesi kezdeskenshe” dep qoshtasqan bolatyn. Sol sátten-aq onyń meniń adamym ekenin túsindim. Ol kezde aıaǵym týraly eshteńe suramady. Qurbym oǵan jaǵdaıymdy aıtyp: “Eger ary qaraı sóıleskiń kelmese, qazirden toqtat” degende, ol “joq, men ondaıǵa qaramaımyn, sóılesýdi jalǵastyramyn” dedi. Sol kezde Alla maǵan eń durys adamdy jibergenin tolyq sezindim" dedi ol.
"Qyzym dúnıege kelgeli ómirge degen qushtarlyǵym artty"
Qyzyn qushaǵyna alǵan sátten bastap Arýjannyń ómirge degen kózqarasy túbegeıli ózgergen.
"Anańnyń qadirin balaly bolǵanda túsinesiń degen sóz ras eken. Qyzym dúnıege kelgeli ómirge degen qushtarlyǵym artyp qana qoımaı, júregim mahabbatqa toldy. Ol – meniń eń úlken qýanyshym, ómirimniń máni. Qyzym maǵan jańa maqsat, jańa arman syılaǵan perishte. Jubaıym qyzymyzǵa eń meıirimdi, eń qamqor áke. Onyń kózinen qyzymyzǵa degen sheksiz súıispenshilikti kóremin" deıdi Arýjan.
"Keıde túsinbeı, syn aıtatyndar bolady"
Otbasylyq ómirde túrli qıyndyqtar kezdeskenimen, olardy birge jeńý – Arýjan men Dinıslam úshin basty sabaq bolǵan.
«Bizge ómirde túrli synaqtar kezdesti: birde materıaldyq qıyndyqtar, birde densaýlyq máseleleri, birde adamdardyń túsinbeýshiligi. Biraq bárin birge eńserdik. Eń bastysy – bir-birimizge degen senim men qoldaý. Árıne, qoǵamda túrli pikir aıtylady. Keıde túsinbeı, syn aıtatyndar bolady. Biraq biz oǵan asa mán bermeımiz. Sebebi biz úshin eń bastysy – otbasymyzdyń amandyǵy men baqyty. Baqytty januıany syrtqy pikir emes, ishki mahabbat quraıdy. Jubaıym – meniń eń úlken tiregim. Qınalǵan sátte árdaıym sabyrly bolyp, maǵan demeý bolady. Onyń “bári jaqsy bolady” degen qarapaıym sózi maǵan jańa kúsh beredi. Ol – meniń qamqorshym ǵana emes, janymnyń tynyshtyǵy" dedi ol.
Berik otbasynyń basty negizi ne?
Arýjan úshin otbasyndaǵy eń basty baılyq – senim men syılastyq.
"Otbasy úshin eń mańyzdysy – syılastyq pen túsinistik. Shynaıy mahabbat tek sezim emes, ol – kúndelikti qamqorlyq, qurmet, janashyrlyq. Bizdiń otbasymyzdaǵy basty qundylyq – senim. Biz bir-birimizge senip, qýanysh pen synaqty birge bólisemiz. Sol senim otbasymyzdy myqty etedi. Óz jartysyn taba almaı júrgen jandarǵa aıtarym: eń áýeli ózińdi jaqsy kórip, ózińdi tabý kerek. Sonda Alla júregińe saı jartyńdy jolyqtyrady. Asyqpaı, taǵdyrǵa senip, shynaıy mahabbatty kútken durys" deıdi Arýjan Abylaı.