2025 jyldyń basynan beri 297,4 myń qazaqstandyq Skills Enbek kásiptik oqytý platformasynda onlaın-kýrstardan ótip, sertıfıkat aldy. Onyń ishinde 47,5 myńǵa jýyq azamat jumyssyzdar qatarynan. Búginde platformada barlyǵy 827,6 myń adam tirkelgen, olardyń 328,9 myńy bıyl qosylǵan. Joba iske qosylǵan ýaqyttan beri 708,3 myń adam oqýdan ótti.
Jumyssyzdardyń ishinde 13,3 myńǵa jýyǵy Túrkistan, Qyzylorda oblystarynan, Almaty jáne Shymkent qalalarynan. Platformada túrli baǵyt boıynsha 1 000-nan astam kýrs jarıalanǵan, onyń 340-y tegin. Sondaı-aq Courstore, Fluent Education jáne Iandeks Qazaqstan seriktesteri daıyndaǵan kýrstar qoljetimdi. Oqytý uzaqtyǵy 1-den 72 saǵatqa deıin.
Tamyz aıynda eń suranysqa ıe bolǵan kýrstar qatarynda «Seniń mansaptyq bastamań: Elektrondyq eńbek bırjasyn paıdalaný joldary», «Ýpravlenıe personalom», «Kasır», «Strahovoı agent», «Pishý jáne tigý» sıaqty baǵdarlamalar bar. Áleýmettik qyzmet kórsetý jáne basqa da salalardaǵy tegin kýrstar sany artyp keledi.
Platforma «ómir boıy oqytý» tujyrymdamasyn ilgeriletýge baǵyttalǵan. Bilim alýshylar oqýdyń qarqyny men tilin ózderi tańdap, oqý barysyn baqylap, kýrs avtorlarymen baılanysa alady. Oqý sońynda test tapsyrylady, ony 70 paıyzdan joǵary nátıjemen aıaqtaǵandar daǵdylardy ıgerý týraly sertıfıkat alady. Sertıfıkat avtomatty túrde Enbek.kz túıindemesine engiziledi jáne jumys berýshilerge kórinip turady.
Kýrstardy ornalastyrý avtorlar úshin tegin. Olar memlekettik, orys jáne aǵylshyn tilderinde usynylady jáne mátin, beıne, aýdıo, ınfografıka sıaqty túrli formattardy qamtıdy. Arnaıy qajettilikteri bar azamattar úshin ınterfeıs beıimdelgen. Avtorlarǵa sabaq qurastyrý quraly, statısıka, sertıfıkat úlgileri jáne onlaın-kalkýlátor qoljetimdi.
2023 jyldyń jeltoqsanynan bastap kýrstardy Enbek mobıldi qosymshasy arqyly da ótýge bolady. Qosymsha Google Play jáne App Store dúkenderinen júkteledi. Platformaǵa tirkelý nemese jumys isteý boıynsha suraqtarǵa «ERDO» AQ jaýap beredi: 8 (7172) 95 43 17 (ishki 877, 888).