Soǵysqa ketip oralmaǵan sarbazdyń súıegi Reseıdiń Novgorod oblysynan tabylǵan.
Soǵys ardageriniń súıegi 79 jyldan keıin týǵan ólkesine jerlendi, dep habarlaıdy Almaty-akshamy.kz Almaty.tv-ge silteme jasap.
80 jylǵa jýyq joǵalǵandar qatarynda bolǵan jaýynger 1916 jyly Jýaly aýdanynda týǵan. Soǵysqa ketip oralmaǵan sarbazdyń súıegi Reseıdiń Novgorod oblysynan tabylǵan. Al artynan qara qaǵaz ǵana kelgen azamattardyń súıegin izdeýmen arnaıy top aınalysady.
«Bizdiń atanyń amanaty» degen qoǵamdyq uıymy Reseı federasıasyndaǵy izdeý komandasymen birigip tapqan. İzdestirý jumysy jalǵasyp jatyr. Qazirgi tańda 12 jaýyngerdiń súıegi tabyldy. Onyń ishinde 8 ofıser bar. İzdeý jumysyna qazaqstandyqtar kómektesti. Óskeleń urpaqty áskerı patrıot retinde tárbıleý kerekpiz. Ata-babalarymyzdyń soǵysqa qatysyp, jetken jetistikteri, erligi jetkizilip otyrýy tıis», – dedi Ońtústik óńirlik áskerı qolbasshylyǵy basqarmasynyń aǵa ofıseri Elmıra Jumasheva.
Saparbaı Imahaevtyń týystary Jýaly aýdanyna qarasty Táttibaı Dúısebaı aýylynda turady. Ardagerdiń súıegi osy eldi mekende turatyn týysyna tabystaldy.
«Osy ýaqytqa deıin eshqandaı habar bolmaǵan. Elimniń, jurttyń arqasynda osyndaı mártebege jettim. Atamnyń súıegi tabylyp, topyraq buıyrǵanyna qýanyshtymyn. Budan keıin soǵys bolmasyn, el aman, jurt tynysh bolsyn», – dedi Saparbaı Imahaevtyń nemere inisi Qosmurat Imahaev.
Áskerılerdiń aqparatyna sáıkes, alda jumys jalǵasyn taba bermek. Erlik jasaǵan erlerdiń esimi eshqashan umyt qalmaıdy.