Aǵylshyn tilin damytý - tıimdi baǵdarlamalardyń biri
QR Oqý-aǵartý mınıstri Asqat Aımaǵambetov AQSH-tyń Qazaqstandaǵy Tótenshe jáne ókiletti elshisi Denıel Rozenblúmmen kezdesti, dep habarlaıdy Almaty-akshamy.kz Zakon.kz-ke silteme jasap.
Kezdesýde eki jaq qazaqstandyq oqýshylardy FLEX baǵdarlamasy boıynsha oqytý, pedagogterdiń biliktiligin arttyrý jáne muǵalimderge arnalǵan sertıfıkattar men kýrstardy taný máselelerin talqylady.
"Elderimiz arasynda bilim berý salasyndaǵy ózara tıimdi yntymaqtastyq ornatylyp, bilim berýdiń barlyq deńgeıinde birden birneshe joba iske asyrylyp jatyr. Biz ártúrli tájirıbe almasý baǵdarlamalaryn qup kóremiz, mysaly, FLEX arqyly 2 000-nan astam oqýshy AQSH mektepterinde oqydy. Aǵylshyn tilin damytý - tıimdi baǵdarlamalardyń biri. Baǵdarlama qatysýshylary uıymdarymyzda aǵylshyn tilin úıretedi. Sondaı-aq STEM jáne ınklúzıvti bilim berýdi damytý boıynsha belsendi jumys istep jatyrmyz. Barlyq baǵyt boıynsha aldaǵy ýaqytta yntymaqtastyǵymyz nyǵaıa túsetinine senemin", - dep aıtty Oqý-aǵartý mınıstri Asqat Aımaǵambetov.
AQSH-tyń Qazaqstandaǵy Tótenshe jáne ókiletti elshisi Denıel Rozenblúm yntymaqtastyqqa daıyn ekenin aıtyp, ekijaqty baılanystyń áleýetin atap ótti.
"El bolashaǵy óskeleń urpaqtyń bilimimen tyǵyz baılanysty. Bul - óte mańyzdy mısıa. Ózińiz ataǵandaı, bizdiń kóp jyldar boıǵy tabysty seriktestigimiz jalǵasyp keledi. Odan ári yntymaqtastyqqa daıynbyz, onyń ishinde, Qazaqstandaǵy muǵalimderdiń biliktiligin arttyrý baǵdarlamalary boıynsha", - dep atap ótti AQSH-tyń Qazaqstandaǵy Tótenshe jáne ókiletti elshisi Denıel Rozenblúm.
Kezdesýde bilim salasyndaǵy yntymaqtastyqtyń basqa da máseleleri talqylandy. Atap aıtqanda, muǵalimderdiń biliktiligin arttyrý, kolejderdi damytý, ınklúzıvti bilim berý.
Sonymen birge taraptar eki eldiń mektepke deıingi, orta, tehnıkalyq jáne kásiptik bilim berý salasyndaǵy áriptestigin odan ári nyǵaıtýǵa jáne keńeıtýge qyzyǵýshylyq bildirdi.