Spıkerdiń aıtýynsha, ıpotekalyq qaryzdardy saqtandyrý boıynsha standarttalǵan sharttardy engizý múmkindigi de qarastyrylýda. Bul qaryz alýshylar úshin saqtandyrý qyzmetterin usynýǵa biryńǵaı talaptar men tásilder ázirleýge múmkindik beredi. Inovasıa ashyqtyqty qamtamasyz etedi jáne saqtandyrý prosesin jeńildetedi.
«Sonymen qatar Agenttik erikti saqtandyrý sharttaryna qoıylatyn bazalyq talaptardy belgileý boıynsha zańnamalyq túzetýler daıyndady. Bul kompanıalardyń klıent úshin tıimsiz saqtandyrý sharttaryna qosymsha saqtandyrý qyzmetterin júktemeýi úshin jasalady. Biz bul sharalar azamattardyń erikti saqtandyrýǵa degen senimin nyǵaıtýǵa jáne ony odan da qoljetimdi ári túsinikti etýge kómektesedi dep kútemiz», – dedi Marıa Hadjıeva.
Spıker mindetti saqtandyrýǵa toqtalyp, ol tabysy ártúrli azamattar úshin qoljetimdi bola otyryp, kóp táýekelden qorǵaýdy usynýy kerek. Ol úshin Agenttik saqtandyrý naryǵyna qatysýshylarmen birlesip saqtandyrýdyń qoldanystaǵy mindetti sanattary boıynsha jaǵdaıdy jaqsartýǵa jáne jańa saqtandyrý ónimderin engizýge baǵyttalǵan sharalardy ázirleıdi.
«2024 jylǵy 1 qańtardan bastap jumyskerlerdi óndiristegi jazataıym oqıǵalardan mindetti saqtandyrý júıesinde zıandy eńbek jaǵdaılarynda jumys isteıtin qyzmetkerler úshin 55 jastan 63 jasqa deıingi 4 eń tómengi kúnkóris deńgeıi (184 912 teńge) mólsherinde aı saıynǵy tólemder kózdelgen. Tólemder tórt kózden júzege asyrylady: respýblıkalyq búdjet esebinen, jumys berýshiniń esebinen, zeınetaqy jınaqtary esebinen jáne saqtandyrý uıymdarynyń esebinen árbir kózden 1 eń tómengi kúnkóris deńgeıinen. Baǵdarlama iske qosylǵannan beri 12 myńǵa jýyq jumysshy erte zeınetke shyǵý múmkindigin paıdalandy. Tólemderge kózdelgen soma 26 mlrd teńgeni quraıdy. Onyń ishinde 4,5 mlrd teńge tólendi», – dep atap ótti QR Qarjy naryǵyn retteý jáne damytý agenttigi tóraǵasynyń orynbasary.
2024 jyldan bastap JOMS sheńberinde zeınetaqy aldyndaǵy tólemderden basqa (qyzmetkerlerdi jazataıym oqıǵalardan mindetti saqtandyrý) jumys berýshilerge eńbek jaǵdaılaryn jaqsartý úshin aldyn alý sharalaryn júrgizýge tólemder júzege asyrylady. Búgingi tańda tek birinshi jyly saqtandyrýshylar 28 mln teńgege jýyq somaǵa aldyn alý tólemderin júzege asyrdy.
«Saqtandyrý uıymdarynyń mindettemeleriniń ósýine baılanysty 2025 jyldyń aqpan aıynda júıeniń qarjylyq turaqtylyǵyn arttyrý úshin qaıta saqtandyrý pýly quryldy. Bul pýl júktemeni onyń qatysýshylary arasynda tıimdi qaıta bólýge, saqtandyrýdyń jalpy shyǵyndaryn azaıtýǵa múmkindik beredi jáne saqtanýshylarǵa saqtandyrýdyń tıimdi sharttaryn jasasýǵa múmkindik beredi», – dedi spıker.
Onyń aıtýynsha, sońǵy 7 jylda saqtandyrý naryǵynda eseptelgen saqtandyrýdyń 7 jańa túri paıda boldy: advokattardyń, zań konsýltanttarynyń, jeke sot oryndaýshylarynyń, keden ókilderiniń, keden qoımasynyń ıeleriniń kásibı jaýapkershiligin saqtandyrý jáne eńbek mıgranttaryn medısınalyq saqtandyrý.
«2024 jyldyń qazan aıynan bastap medısınalyq qyzmetkerlerdi de, pasıentterdi de qorǵaýdy qamtamasyz etetin medısınalyq qyzmetkerlerdiń kásibı jaýapkershiligin saqtandyrý engizildi. Bul dárigerlerdiń kásibı qyzmetindegi qatelikterden nemese kemshilikterden týyndaýy múmkin shyǵyndardy jabýǵa múmkindik beredi. Bul pasıenttiń densaýlyǵyna zıan keltirgeni úshin zıandy óteýdi, sondaı-aq talap qoıý kezinde sot shyǵyndaryn jabýdy qamtıdy. Saqtandyrýdyń bul túrin biryńǵaı saqtandyrý pýly júzege asyrady, oǵan 14 saqtandyrý uıymy qatysady», – dep tolyqtyrdy Marıa Hadjıeva.
Onyń aıtýynsha, pýl iske qosylǵannan beri 1620 shart jasalyp, 186 myń medısına qyzmetkeriniń jaýapkershiligi saqtandyrylǵan. Saqtandyrý syılyqaqylarynyń jalpy somasy 979 mln teńgeni qurady. Biryńǵaı saqtandyrý pýlynyń jarty jyldyq jumysynyń nátıjesinde 35 mln teńge somasyna saqtandyrý tólemderi júzege asyryldy.