«Eńbek resýrstaryn damytý ortalyǵy» AQ Qazaqstan aýdarma akademıasymen onlaın-bilim berýdi damytý salasyndaǵy yntymaqtastyq týraly memorandýmǵa qol qoıdy.
Onyń aıasynda Skills Enbek platformasynda aýdarmashylardyń biliktiligin arttyrý úshin kýrstar katalogy keńeıtiledi, dep habarlaıdy Almaty-akshamy.kz Eńbek jáne halyqty áleýmettik qorǵaý mınıstrligine silteme jasap.
Qazaqstan Aýdarma akademıasy Ortalyq Azıa aýmaǵynda qosymsha kásiptik bilim berý jáne bilikti aýdarmashylardy oqytý qyzmetterin usynady. Kýrstardy tájirıbeli otandyq jáne sheteldik oqytýshylar men aýdarmashylar ázirledi.
Onlaın oqytý qazaqstandyqtarǵa biliktiligin arttyrýǵa, praktıkalyq daǵdylardy alýǵa jáne jańa salada óz mansabyn bastaýǵa múmkindik beredi.
Esterińizge sala keteıik, Skills Enbek platformasy marketpleıs qaǵıdaty boıynsha kýrstarǵa qoljetimdilik beretin halyqaralyq oqytý alańdarynyń qazaqstandyq balamasy bolyp tabylady. Platformada kez kelgen adam oqı alady jáne oqýdy aıaqtaǵannan keıin alynǵan sertıfıkattar men daǵdylar Elektrondyq eńbek bırjasyndaǵy túıindemede avtomatty túrde kórsetiledi.
Skills Enbek iske qosylǵannan beri ártúrli baǵyttar boıynsha 232 kýrs ornalastyryldy, onyń 133-i tegin. Tirkelgen paıdalanýshylar sany 325 myńnan asty, al oqýdy sátti aıaqtap, 270 myńnan astam adam sertıfıkat aldy. Oqýdy aıaqtaǵandardyń ishinde 62 myń adam jumyssyz mártebesine ıe.
Jalpy alǵanda, Qazaqstan Aýdarma akademıasymen yntymaqtastyq ornatý elimizdegi kásibı aýdarma salasynda mamandardyń jańa býynyn daıarlaý úshin qazaqstandyqtarǵa qoljetimdi kýrstardyń bazasyn keńeıtýge múmkindik beredi.