Memleket basshysy Qasym-Jomart Toqaev Qazaqstan Respýblıkasy Memlekettik syılyǵynyń laýreaty, kórnekti jazýshy, dramatýrg Oralhan Bókeıdiń 80-jyldyǵyna arnalǵan konferensıa qatysýshylaryna quttyqtaý hatyn joldady, dep habarlaıdy Almaty-akshamy.kz.
Qadirli qaýym! Sizderdi kórnekti jazýshy, dramatýrg Oralhan Bókeıdiń týǵanyna 80 jyl tolýymen quttyqtaımyn! Oralhan Bókeı – ult rýhanıatynyń kókjıegin keńeıtýge zor úles qosqan birtýar tulǵa.
Qarymdy qalamger ádebıet álemine alǵash qadam basqan sátten bastap shoqtyǵy bıik shyǵarmalarymen oqyrman qaýymnyń yqylasyna bólendi. Onyń «Qaıdasyń, qasqa qulynym», «Qar qyzy», «Uıqym kelmeıdi», «Ataý kere» jáne basqa da týyndylary qazaq ádebıetiniń altyn qoryna qundy qazyna bolyp qosyldy.
Jazýshynyń jaýhar muralary kóptegen shet tiline aýdaryldy, pesalary elimizdiń irgeli óner ordalarynda qoıylyp, kórermen kózaıymyna aınaldy. «Altaıdyń Kerbuǵysy» atanǵan erekshe daryn ıesiniń shyǵarmashylyq joly, azamattyq ustanymy jáne qaıratkerlik qasıeti – jastarǵa árdaıym úlgi-ónege. Onyń mol ádebı murasy áli talaı urpaqqa rýhanı azyq bola beretini sózsiz. Barshańyzǵa zor densaýlyq, baq-bereke tileımin!